काठमाडौँ । नेकपा एमालेको केन्द्रीय कमिटी बैठक आज (मंगलबार) पनि बस्दैछ ।

च्यासलस्थित तुल्सीलाल स्मृति प्रतिष्ठानको भवनमा आज अपराह्न ३ बजे बस्ने बैठकले सोमबार सोधिएको स्पष्टीकरणबारे निर्णय गर्ने जनाइएको छ । यसबाहेक विधान महाधिवेशनको तयारीका निम्ति समितिहरु घोषणा हुने सम्भावनासमेत रहेको बताइएको छ ।

सोमबारको बैठकले माधव नेपालसहित कांग्रेस सभापति शेरबहादुर देउवालाई प्रधानमन्त्रीका लागि विश्वासको मत दिने वरिष्ठ नेता माधवकुमार नेपालसहित २२ सांसदलाई २४ घण्टे स्पष्टीकरण सोधे पनि उनीहरुले यसको जवाफ दिएका छैनन् ।

यसअघि सोमबारको बैठकले पार्टी एकताका लागि कार्यदलले बुझाएको १० बुँदे प्रस्ताव पनि अनुमोदन गरेको थियो ।

यस्तै एमालेले पार्टी निर्देशन नमानेर देउवालाई विश्वासको मत पनि नदिइ संसद बैठक बहिष्कार गरेका १० सांसदको हकमा भने कुनै निर्णय गरेको छैन ।

यता संसद बैठक शुरु हुनुअघि नेता भीम रावलले सांसद पदबाट राजीनामा दिएको घोषणा गरेपनि उनको राजीनाम अझै स्वीकृत भएको छैन । एमाले अध्यक्ष केपी शर्मा ओलीले पनि हतारिएर राजीनामा गरेको भन्दै सकेसम्म फिर्ता लिन आग्रह गरेका थिए ।

त्यस्तै वरिष्ठ नेता झलनाथ खनाल भने हाल उपचारका लागि भारतको दिल्लीमा रहेको र उनले दिल्लीबाटै देउवालाई विश्वासको मत दिन आग्रह गरेका थिए ।