मोरङ । मोरङको लेटाङ–५ मा स्थानीय र प्रहरीबीच झडप हुँदा एक महिला प्रहरीको ज्यान गएको छ ।

स्थानीय शिक्षा विकास माविका एक शिक्षकले छात्रालाई यौन दुर्व्यवहारको गरेको विषयमा हिजो भएको सर्वपक्षीय छलफलमा विवाद बढ्दै जाँदा भिडको आक्रमणमा परि प्रहरी जवान उर्मिला श्रेष्ठको ज्यान गएको हो ।

उनको कोसी अस्पतालमा उपचारको लागि लैजाँदै गर्दा बाटोमै ज्यान गएको मोरङ प्रहरीले जनाएको छ । उनको शव अहिले कोशी अस्पतालमा राखिएको छ ।

घटनामा अन्य एक दर्जनभन्दा बढी प्रहरी घाइते भएका छन् ।

विद्यालयकी एक १२ वर्षीया छात्राले ती शिक्षक बारम्बार आफ्नो घरमा नै आएर आफूमाथि दुव्र्यवहार गर्ने गरेको र शुक्रबार पनि होली खेल्ने क्रममा घरमै आएर आफूलाई यौन दुर्व्यवहार गरेको बताएपछि हिजो विद्यालयमा यसबारे छलफल भएको थियो ।

छलफल भइरहँदा स्थानीयले शिक्षकलाई बन्दी बनाएर आक्रमणको प्रयास गरेपछि प्रहरी परिचालन गरिएको थियो ।

आक्रोशित स्थानीय बासिन्दाले प्रहरीमाथि नै आक्रमण गरेको र आक्रमणमा परेर प्रहरी जवान श्रेष्ठको ज्यान गएको प्रहरीले जनाएको छ ।आक्रोशित भिडलाई नियन्त्रणमा लिन प्रहरीले केही सेल अश्रु ग्यास र हवाई फायर गरेको थियो ।

अहिले स्थिति नियन्त्रणमा आएको र लेटाङ आसपासका क्षेत्रमा बिहान ७ बजेदेखि अर्को आदेश नभएसम्मका लागि कर्फ्यु लगाइएको छ ।
घटनाको थप अनुसन्धान भइरहेको प्रहरीले जनाएको छ ।