पोखराबाट तीर्थ यात्रा निस्केका पोखरेलीहरु सम्भावित ठूलो दुर्घटनाबाट जोगिएका छन् । उनीहरुले रिजर्भ गरेको ग१ख ६८० नम्बरको बस अर्घाखाँचीको सन्धिखर्क नगरपालिका–२ भलायडाँडाको ओरालोमा शुक्रबार पूर्वान्ह ११ बजेको समयमा ब्रेक फेल भएको हो ।

पोखरा साना किसान कृषि सहकारी संस्था बेगनासका सेयर सदस्यहरू २३ जना बस चालकले सही समयमा सही निर्णय गर्दा जोगिए । यद्यपी, गाडीमा सवार अधिकांश सामान्य घाइते भएका छन् । गम्भीर घाइते भएका दुईजनाको बुटवल रिफर गरिएको अर्घाखाँची अस्पतालले जानकारी दिएको छ । यद्यपि घाइतेहरूको अवस्था खतरामुक्त रहेको बताइन्छ ।

गत चैत २३ गते पोखराबाट प्रस्थान गरेका उनीहरु हिजो प्युठानमा रहेको ऐतिहासिक स्वर्गद्वारी मन्दिर दर्शन गरी आज शुक्रबार सुपा देउराली मन्दिर, सन्धिखर्कतर्फ जाँदै थिए । आजको रात त्यहीँ बिताएर भोलि पोखरा फर्कने योजनामा थिए ।

सन्धिखर्क पुग्न एक किमी पनि बाँकी नरहँदै ओरालोमा गुडिरहेको बसको ब्रेकले एक्कासी काम नगरेको यात्रुले बताएका छन् । बस चालक सुरेश सुनार हुन्। अगाडि सहज वा तेस्रो बाटो आउने आशमा दुई घुम्ती कटाएका चालक सुनारले झन् ठूलो ओरालो देखेपछि सबैलाई पछाडि सर्न आग्रह गरी भित्तामा बस ठोक्याएका थिए । बसको ईञ्जिन लगायत अगाडि भागमा पूर्ण क्षति पुगेको छ ।

चालकले बडो कुशलताका साथ आफूहरूलाई बचाएको सहकारीका सेयर सदस्यहरुले बताएका छन् ।