मोरङ। सहकारी संस्थाबाट रकम ठगी गरेको आरोपमा प्रहरीले संस्थाका क्षेत्रीय प्रबन्धकसहित ३ जनालाई पक्राउ गरेको छ ।

विराटनगर महानगरपालिका -२ स्थित तुलसी (बहुमुखी) बहुउद्देश्यीय सहकारी संस्था लिमिटेडबाट रकम ठगी भएको घटनामा संलग्न रहेको आरोपमा प्रहरीले उक्त सहकारी संस्थाका क्षेत्रीय प्रबन्धकसहित ३ जनालाई पक्राउ गरेको हो । पक्राउ पर्नेहरुमा क्षेत्रिय प्रबन्धक विराटनगर -२ बस्ने मन्दिप खवास, संस्थाका उपाध्यक्ष उर्लाबारी नगरपालिका -६ घर भएकी अनिता गौतम र संस्थाका सचिव झापा भद्रपुर -१४ घर भई हाल विराटनगर – ३ बस्ने सविना न्यौपाने रहेका छन् ।

प्रहरीका अनुसार २०५२ सालमा स्थापना भएको उक्त संस्थाको मुख्य कार्यालय विराटनगर -२ मा रहेको र यही फागुन १ गतेदेखि सेयर सदस्यहरुलाई कुनै जानकारी नदिई कार्यालय बन्द गरी ठगी गरेको भनि सेयर सदस्यहरुले दिएको जाहेरीको आधारमा जिल्ला प्रहरी कार्यालय मोरङबाट खटिएको प्रहरीले उक्त कार्यमा संलग्न उनीहरुलाई पक्राउ गरेको हो ।

उक्त संस्थाले विभिन्न शिर्षकको बचत खातामा रहेको रकम, संस्थाको शेयर सदस्य हुँदा १५ प्रतिशत भन्दा बढी व्याज, बोनस लगायतका आकर्षक आर्थिक सुविधा पाउने आश्वासन र प्रलोभनमा पारी बचत गर्न लगाएको ठुलो रकम हिनामिना गरी कार्यालय बन्द गरेर सञ्चालक समितिका सबै पदाधिकारीहरू सम्पर्क विहीन हुँदै आएका थिए ।

सञ्चालकहरु नै फरार भए पश्चात आफूहरु ठगीमा परेको भन्दै फागुन २८ गते केही बचत कर्ताहरुले १२ करोड ९ लाख ४ हजार ४ सय ८७ रूपैया बराबरको रकम ठगी भएको भनि संस्थामा कार्यरत ८ जनाको बिरुद्धमा जाहेरी दिएको र सोही जाहेरीको आधारमा ३ जनालाई प्रहरीले पक्राउ गरेको हो ।

घटनामा संलग्न अन्य ५ जनाको खोजी गर्नुका साथै यस सम्बन्धमा थप अनुसन्धान भइरहेको प्रहरीको भनाई छ ।