काठमाडौं । संयुक्त राजनीतिक दलित संघर्ष समितिले गृहमन्त्री नारायणकाजी श्रेष्ठसँग दलित समुदायमाथि बढ्दै गएको हिंसाविरुद्ध उचित प्रशासनिक पहल चाल्न आग्रह गरेको छ ।

आइतबार एक ज्ञापनपत्र बुझाउँदै संघर्ष समितिले पछिल्लो समय दलितमाथि भेदभावका घटना भैरहनुले संविधान र कानुनको उपहास भएको जनाउँदै उपप्रधानमन्त्रीसमेत रहेका श्रेष्ठको ध्यानाकर्षण गराएको हो ।

तातोपानी गाउँपालिका–४, जुम्लामा अन्तरजातीय प्रेमविवाह गरेको आरोपमा दलित समुदायका मुकुन्द नेपालीको घरमा आगजनी हुनु, आरुघाट, गोरखाका सन्तोष नेपालीलाई अन्तरजातीय विवाहकै कारण जबर्जस्ति करणी मुद्दामा फसाइनु, भगवापुर, सिरहामा दलितहरूमाथि धम्की र कुटपिट जारी रहनु तथा बैतडी, कास्की, रूपन्देही, दाङलगायतका जिल्लामा शृङ्खलाबद्ध भेदभावका घटना भइरेहको संघर्ष समितिको भनाइ छ ।

“अन्तरजातीय प्रेम र विवाह बढ्दै जाँदा त्यसलाई बालविवाह, अपहरण र जबरजस्ती करणीका नाममा दलितहरूलाई फसाउने आपराधिक काम हुँदै आएको छ । तसर्थ प्रशासन र न्यायिक क्षेत्रले अन्तरजातीय प्रेम र विवाहलाई जातीय विभेद र उत्पीडनको संवेदनशीलताबाट बुझ्न जरुरी छ,” ज्ञापनपत्रमा भनिएको छ ।