हेटौंडा । आकस्मिक बाहेकका हेटौँडाका सम्पूर्ण स्वास्थ्य संस्थाले सबै सेवाहरू बन्द गरेका छन् ।

गत बुधबार हेटौंडा उपमहानगरपलिका– १ मा रहेको सन्चो अस्पतालमा कार्यरत दुई जना डाक्टर माथि अस्पताल भित्रै भएको कुटपिटको विरोधमा कारवाहीको माग गर्दै हेटौँडाका सरकारी तथा निजी स्वास्थ्य संस्थाका आकस्मिक बाहेकका सबै सेवा बन्द गरिएको हो ।

चिकित्सकरूले दोषीमाथि कारबाही नभए सामूहिक राजीनामा दिने चेतावनीसमेत दिएका छन् ।

गत महिना डेंगु रोगबाट सङ्क्रमित हेटौँडा–१२ पदमपोखरीका ४१ वर्षीय राजेश प्रधानको उपचारमा लापरवाही गरेको भन्दै उनका आफन्तहरुले गत बुधबार डाक्टर विकास थापा तथा प्रशान्त विडारीमाथि कुटपिट गरेका थिए ।

सञ्चो अस्पतालमा उपचार सम्भव नभएपछि चितवन मेडिकल कलेजमा सिफारिस गरिएको थियो । त्यहाँ मेडिकल कलेजमा डेंगी सङ्क्रमित प्रधानको उपचारका क्रममा मृत्यु भएको थियो ।

कुटपिटमा संलग्न प्रधानकी श्रीमती र छोरीसहित अन्य दुई जनालाई प्रहरीले बिहीबार पक्राउ गरि आवश्यक अनुसन्धान गरिरहेको जिल्ला प्रहरी कार्यालय मकवानपुरले जनाएको छ ।