मोडल तथा अभिनेत्री दीपाशा बीसीले बिष सेवन गरेर आत्महत्या गरेकी छिन्। बुधबार बेलुकी करिब साढे ८ बजे दीपाशाले आफ्नै घरमा बिष सेवन गरेकी थिइन्।

निकटस्थका अनुसार उडुसको औषधि खाएर सिकिस्त अवस्थामा उनलाई हिजो राति नर्भिक अस्पताल ल्याइएको थियो । दीपाशालाई सँगै बस्ने भाइ र बहिनीले अस्पताल पुर्याएका थिए । आज दिउँसो करिब साढे १२ बजे डाक्टरले मृत घोषित गरेका हुन् ।

उनले बिष सेवन किन गरिन् भन्नेबारे केही खुलेको छैन। उनी केही समयदेखि निराशा र तनावबाट गुज्रिरहेकी थिइन् । सुर्खेत घर भएकी दिपाशा आर्थिक समस्याबाट गुज्रिरहेको बुझिएको छ । केही समयअघि उनले मिटरब्याजमा ठूलो परिमाणमा ऋण लिएकी थिइन् । उक्त ऋणको ब्याज सय गुणासम्म बढेपछि उनले तिर्न नसकेको स्रोतको भनाइ छ । उनले कलाकारिता क्षेत्रका केही व्यक्तिहरुसँग आर्थिक सहयोग समेत मागिरहेकी थिइन् ।

म्युजिक भिडियो क्षेत्रमा चर्चा कमाइरहेकी दीपाशालाई ‘जलपरी’ उपनामले समेत दर्शकले चिन्दै आएका थिए। सुर्खेतकी बिसीले केही चलचित्रका साथै दर्जनौँ म्युजिक भिडियोमा अभिनय गरेकी थिइन् । उनी राम्रो नृतंङगनासमेत थिइन् ।

उनले बिरानो माया, झेली, दुलही रानीलगायत चलचित्रमा अभिनय गरेकी थिइन्  । उनलाई लोक दोहोरी मोडल भनेर पछिल्लो समय चिन्ने गरिन्थ्यो।

हिजो बिहानसम्म सुटिङका तस्वीर पोष्ट गरेकी थिइन् । देश तथा विदेशका स्टेज शोमा पनि उनको डिमान्ड थियो । बुझिए अनुसार उनीसँग क्यानाडाको पाँच वर्षको भिसा समेत थियो । उनी हालै मात्र क्यानाडा गएर आएकी थिइन् । ४० जनाको टोली क्यानाडा गएकोमा अधिकांस उतै बसेका थिए भने ५-७ जना मात्रै फर्किएका थिए । फर्किनेमा दीपाशा पनि थिइन् ।