स्याङ्जाको चापाकोट नगरपालिकामा ट्यांकर दुर्घटना हुँदा दुई जना घाइते भएका छन् ।

घाइते हुनेमा रुपन्देही बुटवल उपमहानगरपालिका -१८ नयाँ गाउँ बस्ने ३१ वर्षीय ट्यांकर चालक हिरा परियार र स्याङ्जा चापाकोट नगरपालिका -५ मकैडाँडा बस्ने ३२ वर्षीय सह-चालक जिगर परियार रहेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

आइतबार राति चापाकोट -५ हिलामराङ स्थित ज्याग्दी खोलाबाट मकैडाँडातर्फ पानी लिएर जाँदै गरेको हिमाल कन्स्ट्रक्सन प्रालिको ट्यान्कर उकालोमा सडकबाट करिब २०० मिटर तल खस्दा दुर्घटना भएको प्रहरीले जनाएको छ ।

घाइते सह-चालकलाई चापाकोट नगर अस्पतालमा उपचार पश्चात् डिस्चार्ज गरिएको र चालकलाई रामपुर अस्पताल पाल्पामा प्राथमिक उपचार पछि पोखराको गण्डकी मेडिकल कलेजमा थप उपचारका लागि पठाइएको डिएसपी रानाले बताए ।

दुर्घटनाको सम्बन्धमा आवश्यक अनुसन्धान भइरहेको प्रहरीले जनाएको छ ।