पोखरामा १७ वर्षपछि पूर्व राजा श्री ५ वीरेन्द्र वीर विक्रम शाहको शालिक पुनः स्थापना गरिएको छ ।

पोखरा महानगरपालिका-१० रामबजारमा गएराति १ः४५ बजे साइत पारेर पूर्व राजा वीरेन्द्रको शालिक राखिएको हो । पोखराका तीन वडाहरू वडा नम्बर १०, १४ र १५ को संगम स्थल यो चोक पहिले वीरेन्द्र चोक नै थियो भने चोकमा वीरेन्द्रको शालिक पनि थियो ।

यो ठाउँमा २०५९ सालमा वीरेन्द्रको सालिक स्थापना गरिएको थियो । ६२/६३ को जनआन्दोलनको बेला माओवादी कार्यकर्ताले पूर्वराजा वीरेन्द्रको शालिक हटाएका थिए । पूर्व राजा वीरेन्द्रको ८ फिट अग्लो ढलोटको शालिक निर्माण गरिएको राप्रपा कास्कीका प्रवक्ता अरूण गिरीले जानकारी दिए ।

शालिक राखेपनि अरु काम बाँकी नै रहेको र २५ लाख बजेट लाग्ने अनुमान छ । शालिक पुनः स्थापनामा संलग्नका अनुसार स्थानीयकै समन्वयमा शालिक पुनः स्थापना गरिएको हो । शालिक पुनः स्थापना गर्न स्थानीयको समिति नै बनेको थियो । मनवीर गुरुङको अगुवाइमा शालिक पुनर्निर्माण समिति बनाएर काम गरेको थियो ।

वीरेन्द्र चोकमा पुनःस्थापित वीरेन्द्रको शालिक स्थापनाको सामाजिक सञ्जालमा व्यापक चर्चा भइरहेको छ । लगभग सबैजसोले समर्थन गरेको देखिन्छ ।

तर, शालिक संरक्षणबारे आशंका पनि छ । वडा प्रहरी कायालय रामबजारबाट ५० मिटर दुरीमा रहेको यो चोकमा खडा गरिएको शालिकमा हानी भए प्रहरीमाथि पक्कै पनि प्रश्न उठ्नेछ । शालिक स्थापनामा खटिएका एक युवक भन्छन्ः ‘रामबजार प्रहरी कार्यालयबाट चोक नजिकै रहेकाले संरक्षण हुनेमा ढुक्क हुन सकिन्छ ।’

पृथ्वीचोकमा भने पृथ्वीनारायण शाहको शालिकको स्थानमा लखन थापाको शालिक स्थापित भइसकेकाले विवाद छ ।