स्याङ्जाको कालीगण्डकी गाउँपालिकामा गण्डकी प्रदेशस्तरीय बुद्धिचाल प्रतियोगिता हुने भएको छ ।

यहि जेठ १२ र १३ गते कालीगण्डकी नदिमा चल्ने स्टिमरमा प्रदेश खेलकुद परिषद र कालीगण्डकी गाउँपालिकाको संयुक्त आयोजना तथा गण्डकी प्रदेश बुद्धिचाल संघ कास्कीको व्यवस्थापनमा प्रदेशस्तरीय अन्तर जिल्ला पुरुष तथा महिला बुद्धिचाल  प्रतियोगिता हुने भएको हो ।

बिहीबार वालिङ्मा आयोजित पत्रकार सम्मेलनमा गण्डकी प्रदेश बुद्धिचाल संघका अध्यक्ष युवराज भण्डारीले प्रदेशको सबैभन्दा ठूलो प्रतियोगिता हुने र रेटिङ प्रतियोगिता हुने जानकारी दिए । उनले आयोजक रहेको पालिकाले जिल्ला सरह खेलाडी खेलाउने र प्रदेशका ११ वटा जिल्लाले दुई पुरुष र दुई महिला गरि ४८ जना खेलाडीको प्रतिस्पर्धा रहने बताए । खेल राष्ट्रिय आर्बेटरबाट खेलाइने छ भने पुरुषतर्फ सात राउन्ड र महिलातर्फ पाँच राउन्ड हुनेछ ।

प्रतियोगितामा प्रथम, द्वितिय र तृतीय हुनेले महिलापुरुषतर्फ समान ७ हजार, ५ हजार र ३ हजार नगद प्राप्त गर्नेछन् भने एक वर्षसम्म देशभरीका प्रदेशस्तरीय प्रतियोगितामा प्रदेश संघको तर्फबाट विजेताहरुले प्रतिस्पर्धा गर्न पाउनेछन् । त्यस्तै प्रतियोगितामा सहभागी खेलाडीले यातायात सुविधा र दैनिक खेलाडी भत्ता प्राप्त गर्नेछन् ।

देशकै पहिलो जलयातायात स्टिमरमा उद्घाटन खेल खेलाएर बाँकी खेल पालिकाको भवनमा खेलाइने कालीगण्डकी गाउँपालिकाका अध्यक्ष खिम बहादुर थापाले जानकारी दिए । प्रतियोगिताले धार्मिक महत्त्व बोकेको कालीगण्डकी र ऎतिहासिक जलयातायात स्टिमर सेवाको संरक्षण तथा संर्वद्वनमा सहयोग पुग्ने आशा राखेको जनाउँदै उनले खेल पर्यटनको विकाससङ्सङ्गै पालिकामा धार्मिक, शैक्षिक, स्वास्थ्य र खेलका पर्यटकहरुलाई भित्र्याएर पर्यटन विकासमा सहयोग पुग्ने अपेक्षा रहेको बताए ।

कालीगण्डकीले पुर्वाधार विकास सङ्गै खेलकुद क्षेत्रमा पनि ठूलो लगानी गर्दै आएको बताउँदै अध्यक्ष थापाले बुद्धिचाल प्रतियोगिता आयोजना गरि नयाँ खेलको आकर्षण बढाउने र नयाँ खेलाडी उत्पादन गर्ने लक्ष्य राखेको जानकारी दिए ।

देशकै पहिलो मोटरबोट अर्थात् स्टिमर सेवाको विषेश महत्त्व रहेको भन्दै यो महत्त्वलाई राष्ट्रिय तथा अन्तर्राष्ट्रिय जगतमा पुर्याउन यो प्रतियोगिताले कोशे ढुङ्गा सावित हुने उनको विश्वास थियो ।

चेस अर्थात् बुद्धिचाल खेलमा बुद्धिको अधिकतम प्रयोग हुने भएकोले यो खेलले बौद्धिक क्षमताको विकासमा मद्दत पुर्याउने, खेलले स्मरण शक्तिको विकास पनि गर्ने र अल्जाईमर जस्तो रोगलाई निवारण गर्न मद्दत पुर्याउने हुँदा गण्डकी प्रदेश खेलकुद परिषदसङ्ग सहकार्य गर्दै यो खेललाई प्राथमिकताको साथ संचालन गर्न खोजिएको कालीगण्डकी गाउँपालिकाले जनाएको छ । उक्त प्रतियोगिता सम्पन्न गर्न कालीगण्डकी गाउँपालिकाले र प्रदेश खेलकुद परिषदले ६ लाख खर्च हुने आयोजकले जनाएको छ ।