दाङ । दाङमा लाठी प्रहार गरी एक व्यक्तिले श्रीमतीको हत्या गरेका छन्।

लमही नगरपालिका–९ स्यालेका ४४ वर्षीय चक्रबहादुर भनिने श्यामकुमार कुमालले लाठी प्रहार गरी ४२ वर्षीया श्रीमती इश्वरी कुमालको हत्या गरेका हुन्।

मंगलबार बेलुका ८ बजेतिर हात्तीखालस्थित पसलबाट फर्किने क्रममा घर नजिकै बाटोमा मदिराले मातेका श्रीमानले सामान्य विवादकै क्रममा श्रीमतीमाथि लाठी प्रहार गर्दा घटनास्थलमै उनको मृत्यु भएका प्रहरीले जनाएको छ।

प्रहरीका अनुसार पसलमा दुबैजनाले मदिरा सेवन गरेका थिए। मदिराले मातेकी श्रीमती घरमा जान नमानेपछि श्रीमानले घर तर्फ लगेको स्थानीयले बताएका छन्।

बाटोमा उनीहरू बीचमा सोही कुरामा विवाद हुँदा श्रीमानले श्रीमतीको टाउको लगायत विभिन्न भागमा लाठी प्रहार गरेपछि उनको घटनास्थलमै मृत्यु भएको प्रहरीले जनाएको छ।

श्रीमतीको हत्या गरी फरार भएका कुमाललाई जलकुन्डीका स्थानीयले नियन्त्रणमा लिएर प्रहरीलाई बुझाएका थिए। हत्या आरोपी कुमाल वडा प्रहरी कार्यालय लमहीको प्रहरी हिरासतमा राखिएका छन्।

घटनाबारे थप अनुसन्धान भइरहेको प्रहरीले जनाएको छ।

इश्वरीको शवलाई पोष्टमर्टमका लागि लमही अस्पतालमा लगिएको छ। उनीहरूका तीन छोरी र एक छोरा छन्।