काँग्रेस एमालेको नयाँ सत्ता समिकरण अनुसार गण्डकीमा पनि ढिलै गरी सरकार हेरफेर हुँदैछ ।

मुख्यमन्त्री सुरेन्द्रराज पाण्डेका अनुसार कांग्रेसले ५ र एमालेले ४ मन्त्रालय लिनेगरी दुई दलबीच सहमति भएको छ । यही सहमति पछि आइतबार बसेको मन्त्री परिषद बैठकले गण्डकीमा ९ वटा मन्त्रालय बनाउने निर्णय गरेको हो ।

यद्यपी, कुन मन्त्रालय कसले लिने भन्ने सहमति नभइसकेको बताउँदै उनले भने,‘अब छिट्टै एमाले सरकारमा सहभागी हुन्छ । सायद १/२ दिन भित्रैमा ।’

मुख्यमन्त्री पाण्डेले गठबन्धनको मर्म अनुसार गण्डकीमा सरकार बन्ने बताएपनि आफूलाई दुःखमा साथ दिएका नेकपा माओवादीको चुनाव चिह्नबाट जितेका फडिन्द्र देवकोटा र मनाङबाट स्वतन्त्र जितेका राजिव गुरुङ उर्फ दीपक मनाङेलाई भने नहटाउने भएका छन् ।

उनीहरुलाई कांग्रेसको कोटामा परेका मन्त्रालय दिएर राख्ने तयारीमा उनी छन् । त्यसमा एमाले सहमत भइसकेको मुख्यमन्त्री पाण्डेले दाबी गरे । ‘हाम्रो तर्फको मन्त्रालय दिने भएकाले यसमा उहाँहरुको असहमति छैन । यसबारे शीर्ष तहमै सहमति भइसकेको छ,  कांग्रेसको ५ वटा मन्त्रालयमै उहाँहरू अट्नुहुन्छ ।’–उनले भने ।

काँग्रेसका अहिल्यै ३ जना छन् र २ जना नहटाउँदा अब एमालेका ४ जना मात्र थपिन्छन् । काँग्रेसबाट मन्त्री थपिनेछैनन् ।

हाल भौतिक पूर्वाधार विकास मन्त्री रहेका मनाङेको मन्त्रालय भने फेरिने निश्चित छ । उनको मन्त्रालय नयाँ समीकरणपछि एमालेले पाउनेछ ।  देवकोटा भने ऊर्जा, जलस्रोत तथा खानेपानी मन्त्रीमा यथावत् रहने अधिक सम्भावना छ । मनाङेलाई उद्योग तथा पर्यटन मन्त्रालयको जिम्मा दिन सक्नेछ ।

गण्डकीमा मंगलबारसम्म एमाले सरकारमा सहभागी हुनेछ । त्यसका लागि मन्त्रालयको संख्या थपेर ९ पुर्‍याइएको छ । आइतबार बसेको मन्त्रिपरिषद् बैठकले सामाजिक विकास तथा स्वास्थ्य मन्त्रालय र उद्योग, पर्यटन, वन तथा वातावरण मन्त्रालय फुटाउने निर्णय गरेको हो ।

गण्डकीमा केन्द्रीय गठबन्धनको मर्म अनुरुप गठबन्धन सरकार नबनेकोमा एमाले असन्तुष्ट रहँदै आएको थियो । एमाले उपमहासचिव समेत रहेका सूचना, प्रविधि तथा सञ्चार मन्त्री पृथ्वी सुब्बा गुरुङले त गण्डकीमा गठबन्धनको मर्म अनुसार सरकार नबनेको भन्दै शनिबार पोखरामा भनेका थिए,‘कहिं नभएको जात्रा गण्डकीमा’भनेर टिप्पणी गरेका थिए । तर मुख्यमन्त्री पाण्डे भने केन्द्रको गठबन्धन अनुसारै गण्डकीमापनि सरकार बन्ने बताउँछन् ।

‘उहाँले कुरै नबुझी त्यस्तो टिप्पणी गर्नु भएछ’, आइतबार आयोजित पत्रकार सम्मेलनमा मुख्यमन्त्री पाण्डेले भने,‘पार्टीको नेताले कुरा नबुझी बोल्दाको परिणाम हो यो । पार्टीको नेतालाई शीर्ष नेताले गरेको सहमति थाहै नभई बोल्दा बिग्रिएको हो ।’ पृथ्वी सुब्बा यस प्रदेशका संस्थापक मुख्यमन्त्री पनि हुन् ।