पोखराको फिर्के पुलबाट मोटरसाइकल खस्दा तीन जना घाइते भएका छन्।

गएराति समयमा पोखरा महानगरपालिका -४ बागलुङ बसपार्कबाट जिरो किलोमिटरतर्फ जाँदै गरेको ग८प ४९०७ नम्बरको बाइक अनियन्त्रित भइ फिर्के पुलबाट खसेको कास्की प्रहरीले जनाएको छ ।

बाइक पुलबाट तल खोल्सामा खसेकामा सवार तीन जना गम्भिर घाइते भएका छन् । ढाँड भाँच्चिएको, करङ भाँच्चिएको अवस्थामा उनीहरुको उद्धार गरिएको थियो । उनीहरूकाे अहिले उपचार भइरहेको छ ।

थप विवरण आउन बाँकी छ ।

पोखरा महानगरपालिका वडा नं. ४ र ५ को सिमानामा पर्ने उक्त पुल फराकिलो सडकमा साँघुरो भएका कारण बारम्बार दुर्घटना हुने गरेको छ।

पोखराको जिरोकिलोमिटरदेखि बिन्दवासिनीसम्म चार लेनको सडक बनेको ८ वर्ष भयो । यस क्षेत्रमै सबैभन्दा आकर्षक फराकिलो उक्त सडकखण्डमा सडक मात्र बन्यो तर बीचमा पर्ने फिर्के पुल भने उस्तै छ । नजिकै अर्को फराकिलो पक्की पुल बनाउने काम सुरु भएपनि अझै बनिसकेको छैन ।

अहिलेको पुलमा एकैपटक दोहोरो सवारी चल्न पनि साँघुरो छ । बाटो फराकिलो देखेर तीब्र गतिमा गुड्ने सवारीहरु पुल आउने बित्तिकै बीच लेनतर्फ जानुपर्ने हुन्छ तर फराकिलो सडकमा तीब्र गतिमा गुडेका सवारी नियन्त्रण गुमाउँछन् अनि खोलामा खस्छन् । वर्षेनी दुर्घटना भईरहेको छ ।

पुल नजिकै घर भएकी पत्रकार कञ्चन थापाले पुलमा दुर्घटना बढेको कारण सरोकारवालाको ध्यानाकर्षण जनाएको दशक पुग्न लाग्यो । तर, समस्या जस्ताको तस्तै भएपछि आफूलाई दिक्क लागेको सुनाउँछिन् ।