नेकपा मालेका महासचिव सिपी मैनालीले नेकपा एमाले र नेपाली काँग्रेसको सत्ता समीकरण भत्काउन बाह्य शक्ति लागेको बताएका छन्।

शनिवार काठमाडौँमा एकदेव आलेको ५६ औँ स्मृति दिवसमा आयोजित कार्यक्रमलाई सम्बोधन गर्दै उनले यस्तो बताएका हुन्। उनले नेकपा एमाले र नेपाली काँग्रेस मिलेको खण्डमा ०८४ सम्मै सरकार अघि बढ्ने भए पनि बाह्य शक्ति सरकार भत्काउन लागेको बताए।

उनले अहिलेको सरकार भत्काउनका लागि बाह्य शक्तिलाई कतिपय देशभित्रका शक्तिहरूले पनि साथ दिइरहेको बताए। उनले बाह्य शक्ति, अन्तरविरोध र दलाल पुँजीवादी, सामन्तवादी प्रवृत्ति अन्त्य गर्न जरुरी रहेको बताए।

उनले भने, ‘नेपाली काँग्रेस र नेकपा एमाले मिले भने त नढल्ला तर बाह्य शक्ति यिनीहरूलाई मिल्न नदिने भनेर लागिरहेको छ। त्यसले गर्दा बहुमत नै भए पनि सरकार ढल्न कुनै आइतवार लाग्दैन। किनभने बाह्य शक्ति अहिले हाबी छ। बाह्य शक्तिहरूसँगको हाम्रो अन्तरविरोध र दलाल पुँजीवादी, सामन्तवादी प्रवृत्ति यो अहिलेको हाम्रो देशको विरोधी शक्ति हो।’

महासचिव मैनालीले कम्युनिष्टहरू बसेर आफूले गरेका कमी, कमजोरीबारे छलफल गर्न जरुरी रहेको बताए।