पोखरा । इन्जिनियरिङ साहित्यिक सञ्जाल, पोखराको आयोजनामा कला क्षेत्रको संरक्षणका लागि पोखरामा एउटा भव्य कार्यक्रम भएको छ । गत शुक्रबार इन्जिनियरिङ अध्ययन संस्थान (पश्चिमाञ्जल क्याम्पस), लामाचौरमा ‘साहित्य, संगीत र संस्कृतिको संगम’ भन्ने नारा दिएर ‘त्रिवेणी’ कार्यक्रम भएको हो ।

कार्यक्रममा साहित्य, संगीत र संस्कृतिलाई विशेष प्राथमिकता दिइएको थियो । साँस्कृतिक सत्रतर्फ गुरूङ्ग नृत्य, रत्यौली, मैथली, झिझिया, सूदुरपश्चिमको देउडा प्रदर्शन गरियो ।

साहित्यतर्फ श्रष्टाहरुले मुक्तक, लघुकथा, कविता सुनाए । दिनेश आदिव, सरला लामिछाने ‘सरु’, कृष्ण सुवेदी, प्राञ्जल, सुशील सापकोटा, सबु आरोही, विजय रानाभाटले मुक्तक वाचन गरे । आवाज शर्मा, शिव त्रिपाठी, राम अविरल विष्ट, त्रुपक, राज भट्टराईले गजल सुनाए । प्रज्वल अधिकारी, डा. इश्वरमणी अधिकारी, अमृत क्षेत्रीले कविता सुनाए । लक्ष्मण थापा र ढाकामोहन बरालले लघुकथा वाचन गरे ।

संगीततर्फ हालका चर्चित लोकगायक बसन्त थापा गुञ्जिए । उनले अहिले चर्चामा रहेको ‘मयाली’ र अन्य चर्चित गीत सालको पातको टपरी, जाम सुस्तै, बोकेझारलगायत गीत गाए । उनको गीतमा करिब ४ हजार दर्शक झुमेको आयोजकको दाबी छ । पोखराकै दुई निजी विद्यालय प्रतिभा मा. वि. र मदरल्याण्ड मा. वि.को ब्यान्डले गीत प्रस्तुत गरे ।

सोही कार्यक्रममा उपस्थित इन्सासका हालसम्मका अध्यक्षसँग संस्थाको इतिहास र वर्तमानबारे छलफल भयो ।

गण्डकी प्रदेश प्रज्ञा प्रतिष्ठानका कुलपति सूर्य खड्का (विखर्ची)को प्रमुख आतिथ्यतामा भएको कार्यक्रम इन्जिनियरिङ साहित्यिक सञ्जाल, पोखरा इन्सास अध्यक्ष बिजय अधिकारीको अध्यक्षतामा भएको थियो ।

कार्यक्रममा पोखरा प्रज्ञा प्रतिष्ठानका पूर्वकुलपति पदमराज ढकाल, वरिष्ठ गायिका प्राज्ञ हरीदेवि कोइराला, इन्जिनियरिङ क्याम्पस प्रमुख निर्मल बराललगायतको उपस्थिति थियो ।

कार्यक्रममा बोल्दै अध्यक्ष अधिकारीले कुनैबेला साहित्यिक कार्यक्रमलाई मल्टिमिडिया हल नदिने प्राविधिक क्याम्पसमा चौर, कक्षा, हल, अडिटोरियम गर्दै आज देशकै ठूलो साहित्यिक महोत्सव गर्न सफल भएको सुनाए । साहित्य, सृजना, संगीतलाई माया गर्नुपर्ने भन्दै उनले यसलाई निरन्तरता दिइने बताए । अन्य क्याम्पसले पनि यस्ता कार्यक्रमलाई प्राथमिकता दिँदा साहित्यतर्फ विद्यार्थीको रुचि बढ्ने र उनीहरु सिर्जनशील बन्ने उनको भनाइ थियो ।