स्याङ्जाको वालिङ् खेलमैदानमा यहि फागुनदेखि प्रथम पिंक सिटी महोत्सव कप हुने भएको छ ।

वालिङ चेम्बर अफ कमर्सद्वारा ‘आर्थिक सामाजिक सम्पन्न समाज, समृद्ध वालिङ’ भन्ने मुल नाराका साथ आयोजित प्रथम पिंक सिटी महोत्सव – २०८१ को अवसरमा यहि फागुन २५ देखि चैत्र २ गतेसम्म स्याङ्जा जिल्ला पालिका स्तरीय पुरुष भलिबल प्रतियोगिता आयोजना गरिएको हो ।

यस प्रतियोगितामा पालिका बाहिरका तीनजना खेलाडी समावेश गर्न पाइने खेल संयोजक उमराज गुरुङले जानकारी दिए ।

प्रतियोगिताका विजेता टिमले नगद एक लाख ५५ हजार रुपैयाँका साथमा कप, मेडल र प्रमाणपत्र हात पार्नेछ भने उपविजेताले नगद एक लाख ५ हजार रुपैयाँसहित शिल्ड, मेडल र प्रमाणपत्र पाउनेछ ।

त्यस्तै, प्रतियोगितामा तेस्रो हुने टिमले ५५ हजार र चौथों हुनेले ३० हजार रुपैयाँ नगदसहित शिल्ड, मेडल र प्रमाणपत्र पाउनेछन् ।

प्रतियोगिता अवधिभर उत्कृष्ट खेल प्रदर्शन गर्ने खेलाडी मध्ये व्यक्तिगत विधातर्फ सर्वोत्कृष्ट खेलाडीलाई पाँच हजार रुपैयाँ नगद र बेस्ट स्पाइकर, बेस्ट सेटर, बेस्ट सर्भर, बेस्ट ब्लकर र बेस्ट डिफेन्डरलाई ३/३ हजार रुपैयाँ नगद प्रदान गरिने खेल संयोजक गुरुङले बताए ।