गण्डकीका नेता जन्माउने क्याम्पस भनेर चिनिने पृथ्वीनारायण क्याम्पसमा २०६५ सालपछि स्वतन्त्र विद्यार्थी युनियन (स्ववियु) निर्वाचन हुन सकेको छैन ।

नेकपा एमाले निकट विद्यार्थी संगठन अनेरास्ववियुले बाजी मार्दै आएको यस क्याम्पसमा रश्मि आचार्य सभापति चुनिएपछि निर्वाचन हुन सकेको छैन । पिएनको स्ववियु निर्वाचनलाई नेता उत्पादन गर्ने कारखानाको रुपमासमेत हेरिन्छ । यहाँको निर्वाचन परिणाम दलहरुको प्रतिष्ठाको विषय बन्छ ।

देशकै धेरै विद्यार्थी अध्ययन गर्ने ठूलो क्याम्पस पिएनमा यस पटक चुनाव हुने सम्भावना बढेको थियो । तर, निर्वाचन समिति र अधिकृतले गल्ती गर्दा यसपटक पनि अनिश्चित बनेको छ ।

निर्वाचन अधिकृत प्रा.डा. रामचन्द्र पोखरेलले सर्वपक्षीय बैठकमा जातिय विभेदजन्य शब्द प्रयोग गर्दा चुनावी माहौल भड्किन खोजेको अवस्थामा बेलैमा क्षमायाचना गरेर सच्याएका कारण सामान्य बनेको  थियो ।

त्यसपछि चुनावी वातावरण तयार भइरहँदा निर्वाचनकै दिन फेरि भाँडियो । मतपत्र छपाईमा त्रुटी गर्दा चुनाव नाचाहने तत्वलाई फाइदा पुगेको छ । मतपत्रमा अखिल छैठौंका उम्मेदवारको नाम पछाडि कोठा नराखिँदा चुनाव भाँड्न निहूँ चाहिएको तत्त्वलाई खोजेजस्तै भयो ।

नत्र, सर्वपक्षीय छलफलबाट निचोडमा पुग्न गाह्रो थिएन । कोठा नभएका कारण त्यस स्थानमा नामको अगाडि वा पछाडि ठीक लगाएमा मान्ने भनेर सहमति कायम गर्न सकिन्थ्यो । तर, भाँड्ने पक्ष नै हाबी बन्दा सहमति बनेन ।

केही विद्यार्थी भने निर्वाचन समितिले जानाजान त्रुटिपूर्ण मतपत्र छापेको  आरोप लगाउँछन् । फाइनल नगरी छापाखानामा कसरी छापिन्छ ? भन्दै उनीहरू प्रश्न गर्छन् । निर्वाचन समिति नै चुनाव हुन नदिने तत्वको हितमा रहँदा यस पटक  पनि चुनाव अनिश्चित बनेको उनीहरुको दुःखेसो छ ।

बुधबार सारिएको  मतदान पनि स्थगित, चुनाव अनिश्चित 

पिएनमा बुधबार हुने भनिएको मतदान पनि स्थगित गरिएको छ । अब अर्को मिति नतोकिएसम्म पिएनमा स्वतन्त्र विद्यार्थी युनियनको निर्वाचन नहुने भएको हो ।

संयुक्त प्यानलसहित अखिल छैठौं र नयाँ शक्ति विद्यार्थी युनियनले तालाबन्दी गरेको कारणले भोलि हुने भनिएको मतदान स्थगित भएको निर्वाचन अधिकृत प्राध्यापक डा. पोखरेलले बताए ।

‘भोलिको निर्वाचन प्रक्रियालाई अगाडि बढाउन बाधा उत्पन्न भएकाले सर्वपक्षीय छलफलद्वारा स्ववीयु निर्वाचनको अर्को निर्वाचन मिति तय गर्ने गरी अर्को सूचना प्रकाशित नभएसम्मका लागि स्थगित गरिएको छ’, उनले भने ।

मंगलबार बिहान ८ बजेदेखि दिउँसो ४ बजेसम्म हुने भनिएको स्ववियुको निर्वाचन मतपत्र छपाइमा त्रुटि भएपछि सुरु हुनै सकेन । निर्वाचन समितिको गम्भीर लापरवाहीले मतपत्र त्रुटि भएको भन्दै अखिल नेपाल राष्ट्रिय स्वतन्त्र विद्यार्थी युनियन (छैठौं) ले विरोध गर्दा मतदान सुरु भएको थिएन ।

निर्वाचन समितिले मतपत्रमा अखिल छैठौंको तर्फबाट सभापतिको उम्मेदवार बनेका मिलन सुनारलाई मतदान गर्नलाई कोष्ठ राखिएको थिएन ।

यसलाई निर्वाचन समितिले आत्मालोचना गरेको जनाउदै बुधबार विहान ८ बजेदेखि दिउँसो ४ बजेसम्मलाई तोकिएकोमा स्थगित गरिएको थियो ।

पृथ्वीनारायण क्याम्पसमा नौ हजार २७० मतदाता रहेका छन् ।

स्ववियु सभापति पदका लागि ८ जना चुनावी मैदानमा उत्रिएका छन् । सभापतिका लागि नेविसंघबाट सुशील न्यौपाने, अनेरास्ववियुबाट विष्णु पोखरेल, अखिल क्रान्तिकारीबाट नवीन अधिकारी, अनेरास्ववियु समाजवादी, अखिल समाजवादी, अखिल क्रान्तिकारी (वैद्य)को संयुक्त प्यानलबाट सन्तोष पौडेल सभापतिका उम्मेदवार हुन् ।

अखिल छैटौंबाट मिलन सुनार र प्राज्ञिक विद्यार्थी परिषदबाट दिप्सन गुरुङले स्ववीयु सभापतिमा उम्मेदवारी दिएका छन् ।

स्ववियु सभापतिका लागि कमल सुवेदी र विप्लवी न्यौपानेले स्वतन्त्र उम्मेदवारी दिएका छन् । सचिवमा ५ जना, कोषाध्यक्षमा ५ जना र ४० जना सदस्य पदका उम्मेदवार छन् । समानुपातिकका लागि अध्यक्षको प्यानलमा रहेका बाहेक नयाँ शक्ति विद्यार्थी युनियन, अखिल क्रान्तिकारी (वैद्य) का उम्मेदवार पनि चुनावी मैदानमा होमिएर प्रतिस्पर्धा गर्दै छन् ।

दुई वर्षे कार्यकालका लागि २१ सदस्यीय स्ववियु समिति निर्वाचित हुनेछन्। सभापति, सचिव र कोषाध्यक्षसहित ११ जना प्रत्यक्ष निर्वाचनबाट चयन हुनेछन् ।