पोखरा । इन्जिनियरिङ अध्ययन संस्थान, पश्चिमाञ्चल क्याम्पस (डब्लूआरसी), लामाचौरमा स्वतन्त्र उम्मेदवार प्रकाश धामी स्वतन्त्र विद्यार्थी युनियन (स्ववियु) अध्यक्षमा निर्वाचित भएका छन् ।

अनेरास्ववियु, नेविसंघ र अखिल (क्रान्तिकारी)का उम्मेदवारलाई पराजित गर्दै धामी अध्यक्षमा विजयी भएका हुन् ।

निर्वाचन अधिकृत ई. दीपक थापाका अनुसार धामीले निकटतम् प्रतिस्पर्धी अनेरास्ववियुका अनुप न्यौपानेलाई २ सय ६७ मतान्तरले पराजित गरेका हुन् ।

धामीले ७ सय १६ मत प्राप्त गर्दा न्यौपानेले ४ सय ४९ मत पाए । नेविसंघका सौगात पण्डितले ३ सय ४६, अखिल (क्रान्तिकारी)का आदर्श महत क्षेत्रीले १ सय ७८ मत प्राप्त गरेको ले जानकारी दिए ।

दार्चुलाका धामीको राजनीतिक पृष्ठभूमि नेकपा माओवादी केन्द्र निकट अखिल (क्रान्तिकारी) हो ।  यस निर्वाचनमा नेत्रविक्रम चन्द विप्लवनिकट अखिल (समाजवादी) समर्थित उम्मेदवार हुन् । यद्यपी, उनले संगठनात्मक नभइ स्वतन्त्र हैसियतमा उम्मेदवारी दर्ता गराए ।  धामी अखिल क्रान्तिकारीको क्याम्पस कमिटी सचिव थिए ।

यस निर्वाचनमा सचिव र कोषाध्यक्ष पद अखिल (क्रान्तिकारी)ले जितेको छ । अखिल (क्रान्तिकारी)का हरिकृष्ण खड्का ९ सय २१ मत ल्याएर सचिव निर्वाचित भए । अनेरास्ववियुका विनायक भुँवाजीले ७ सय ४ मत ल्याए । नेविसंघबाट सचिवकाे उम्मेदवार थिएनन् । आन्तरिक गुटीय विवादका कारण उम्मेदवारकाे मनोनयन पत्र च्यातिँदा सचिवमा उम्मेदवारी खारेज भएको थियो ।

क्रान्तिकारीका शसिस सापकोटा ६ सय ९९ मत ल्याएर कोषाध्यक्ष निर्वाचित भए । अनेरास्ववियुका रोहितकुमार साहले ५ सय ८७, नेविसंघकी रस्मिताकुमारी झाले ३ सय ६६ मत प्राप्त गरे ।

७ सदस्य पदमा अनेरास्ववियुले ५, नेविसंघ र क्रान्तिकारीले १/१ सदस्य जितेका छन् । अनेरास्ववियुका अश्रान्त पहारी ९ सय २६, पूर्णिमा अछामी ८ सय १५, अंकित गैरे ७ सय ७१, अमृत बस्नेत ७ सय ४०, रूपेश पौडेल ६ सय २२, नेविसंघका सक्षम भण्डारी ७ सय ३ र क्रान्तिकारीकी निकिता पाठक ६ सय ८२ मत ल्याएर सदस्य निर्वाचित भए ।

उक्त क्याम्पसमा २ हजार ४१ मतदाता रहेकोमा मंगलबार भएको निर्वाचनमा १ हजार ६ सय ९२ मत खसेको थियो । १ हजार ६ सय ८९ मत सदर भएको थियो ।

समानुपातिक तर्फ सबैभन्दा बढी मत नेकपा एमाले निकट अनेरास्ववियुले प्राप्त गरेको छ । अनेरास्ववियुले ७ सय २६, अखिल क्रान्तिकारीले ५ सय ३२ र नेपाल विद्यार्थी संघले ३ सय ८५ मत प्राप्त गरेका छन् ।