पोखरा वडा नं. १७ बिरौटामा ऐतिहासिक श्रीगण्डकी शत (सय) कुण्डीय गायत्री कोटिहोम विराट् ज्ञान महायज्ञ- २०८२ आयोजना हुँदैछ ।

आइतबार पोखरामा पत्रकार सम्मेलन गर्दै मानव सेवा फाउन्डेसन, नेपालले महायज्ञको आयोजना गर्न लागेको जानकारी गराएका हुन् । आइतबार संकल्पसभा गरी अगाडि बढेको कोटी होमको कार्यक्रम जेठको २६ गतेसम्म निरन्तर रूपका सञ्चालन हुने छ ।

सोही क्रममा गुरू विजय कृष्णमुर्ति महाराजले कुनै पनि कमी कमजोरी हुन नदिने हिसाबले महायज्ञको व्यवस्थापन गरेको भन्दै यसमा केही गल्ती भए सुझाव दिन आग्रह गरेका छन् ।

महायज्ञको संकल्प सभा पनि गरिएको छ । संकल्पसभामा महायज्ञका संकल्पकर्ता बालयोगेश्वर विजय श्री कृष्ण मूर्तीजी महाराजले महायज्ञ अवधिभर हुने विविध कार्यक्रमको बारेमा जानकारी दिँदै ऐतिहासिक श्री गण्डकी कोटिहोम महायज्ञले गण्डकी क्षेत्र र धार्मिक दृष्टिकोणमा यसको महत्व, यज्ञको महिमा, हवनको महिमा, कोटिहोम महायज्ञको उद्देश्य लगायतको विषयमा जानकारी दिएका थिए ।

कोटिहोम महायज्ञमा संकलन भएको रकमले खर्च व्यवस्थापन भएर शेष रहेको रकमबाट पोखरामा १७ मा रहेको हरिहर मन्दिर, मुक्तेश्वर मन्दिर र कैलाशधाम मन्दिरको विकासको लागि पहल गर्ने लगायतको बिषयमा पनि जानकारी दिए ।

गत महिना नै बाराहीघाटमा सञ्चालन हुने भनिएको महायज्ञ पोखरा महानगरपालिकाको अवरोधका कारण त्यहाँ हुन सकेन र भूमिपूजनका बेला झडपको अवस्था पनि सिर्जना भएको थियो । विवाद समाधान समिति बनाएरै महायज्ञको स्थान परिवर्तन गरेपछि सौहार्दपूर्ण रुपमा महायज्ञ सञ्चालन गर्ने वातावरण बनेको हो । पोखरा महानगरपालिकाले पनि यस महायज्ञलाई स्वीकृति र सहमति प्रदान गरेको छ ।

भिडियोका लागि यहाँ क्लिक गर्नुहोस् ।