पोखरा । गण्डकी प्रदेशका निवर्तमान मुख्यमन्त्री खगराज अधिकारीले बौद्ध दर्शन जीवनसँग प्रत्यक्ष जोडिने विषय रहेकाले यसलाई सर्वव्यापी बनाउनुपर्नेमा जोड दिएका छन् ।

लुम्बिनी विश्वविद्यालय, लुम्बिनी अनुसन्धान केन्द्रले आज पोखरामा आयोजना गरेको गण्डकी प्रदेशमा बौद्ध विषयक अन्तर्क्रियात्मक गोष्ठीमा बोल्दै अधिकारीले बौद्ध धर्म, दर्शन, संस्कृति विश्वले थाहा पाउनुपर्ने उच्च श्रेणीको रहेको बताए ।

संघीय पूर्व गृहमन्त्री तथा स्वास्थ्यमन्त्री अधिकारीले पोखरामा अनुसन्धान केन्द्र स्थापना गर्न विलम्व नगर्न अनुरोध गर्दै गण्डकी प्रदेश सरकारले यसका लागि साथ सहयोग गर्नुपर्ने र आफूले सक्दो पहल गर्ने बताए ।

‘बुद्ध एशियाको प्रकाश मात्र होइन, संकुचन गरियाे । संसारले खोजेको अहिंशा, शान्ति र समृद्धिका प्रवर्द्धक बुद्ध हुनुहुन्छ’ – उनले भने – ‘बुद्ध दर्शनलाई अन्तर्राष्ट्रियस्तरमा फैलाउनुपर्छ । अनुसन्धान केन्द्रहरू देश विदेशमा स्थापना गर्न अग्रसर हुनुपर्छ ।’

बौद्ध विश्वविद्यालयले पर्याप्त तपोभूमि, विहार बनाउँदै धार्मिक पर्यटकीय गन्तव्य बनाउन अझै मेहनत गर्न सुझाव पनि दिए ।