काठमाडौं । जम्मु कश्मिरको पहलगाममा एक नेपालीसहित २८ जनाको हत्या भएको आतंकवादी हमलामा नेपालको मुस्लिम आयोगले केही नबोलेको भन्दै स्वतन्त्र युवाको नाममा एक समूहले महाराजगन्जस्थित पाकिस्तानी दूतावासबाहिर प्रदर्शन समेत गरेको छ ।

२४ घण्टाको अल्टिमेटम दिएको उक्त समूहले पहलगाम हमलामा पाकिस्तानको हात रहेको भारतीय आरोप सही रहेको भन्दै ब्यानर र प्लेकार्डसहित मुख्य सडकमा केहीबेर प्रदर्शन गरेको हो ।

उनीहरुले पाकिस्तानी सेनाविरुद्ध समेत पोस्टर प्रदर्शन गरेका थिए । स्वतन्त्र युवा समूहको प्रदर्शन चलिरहेकै बेला केही व्यक्ति राप्रपाको ब्यानरमा सोही स्थानमा पुगेका थिए ।

उनीहरुले पहलगाम घटनाको निन्दा गर्दै प्रधानमन्त्री केपी शर्मा ओलीको हात रहेको आरोप लगाएर ओलीविरुद्ध नाराबाजी गरेका थिए ।

पाकिस्तानी दूतावास अगाडिको प्रदर्शनमा आतंकी हमलालाई लिएर प्रधानमन्त्रीविरुद्ध नाराबाजी हुन थालेपछि स्वतन्त्र युवा समूहका प्रदर्शनकारी भने त्यहाँबाट तितरवितर भएका थिए ।

‘पाकिस्तानी दूतावासबाहिरको प्रदर्शन हाम्रो होइन, त्यस्तो नीति पनि छैन’

राष्ट्रिय प्रजातन्त्र पार्टीले भने पाकिस्तानी दूतावासबाहिर राप्रपाको ब्यानरमा गरिएको प्रदर्शनमा पार्टीको संलग्नता नरहेको प्रष्ट पारेको छ ।

राप्रपाका प्रवक्ता मोहन कुमार श्रेष्ठले पाकिस्तानी दूतावासबाहिर आज राप्रपाको ब्यानरमा भएको प्रदर्शन पार्टीको नभएको प्रष्ट पार्दै त्यस्तो प्रदर्शन गर्ने नीति पनि नरहेको बताए ।