सुर्खेत । दैलेखमा राउटे समुदायका युवतीमाथि दुर्व्यवहार गर्ने एक युवा पक्राउ परेका छन् ।

पक्राउ पर्नेमा आठविस नगरपालिका दैलेखका तपेन्द्र शाही रहेको जिल्ला प्रहरी कार्यालय दैलेखले जनाएको छ ।

केही दिन अगाडी गुडिरहेको ट्रकमा चार जना युवतीलाई राखेर ती युवाले दुव्र्यवहार गरेको भिडियो सामाजिक सञ्जाल फेसबुकमा सार्वजनिक गरेका थिए । सोही भिडियोको आधारमा उनलाई आज बिहान आठविस नगरपालिकाको टुनिवगरबाट पक्राउ गरिएको प्रहरीले जनाएको छ।

केही दिन अघि ‘घर्ती जगत’ नाम भएका फेसबुक प्रयोगकर्ताले १५ सेकेन्डको भिडियो सार्वजनिक गरेका थिए । भिडियो सार्वजनिक गर्दै ‘समाजमा के सन्देश जान्छ, पक्कै राम्रो हैन?’ भन्दै भिडियो सार्वजनिक गरिएको थियो । त्यसपछि प्रहरीले भिडियो सार्वजनिक गर्ने व्यक्तिको खोजी थालेको थियो ।

चार जना राउटे युवतीको बिचमा बसेका तपेन्द्रले गलत हर्कत गरिरहेको भिडियो क्लिपमा देख्न सकिन्छ । अँगालोमा हालेर ताजा ताजा भनेपछि राउटे युवतीहरूले असहज मानिरहेको भिडियोमा देखिन्छ ।

घटना बारे थप अनुसन्धान भइरहेको प्रहरीले जनाएको छ ।