काठमाडौं । १० दिने चीन भ्रमणबाट फर्किएकी पूर्वराष्ट्रपति विद्या भण्डारीले आफ्नो भ्रमण राम्रो भएको प्रतिक्रिया दिएकी छन् ।

विमानस्थलमा सञ्चारकर्मीलाई संक्षिप्त प्रतिक्रिया दिँदै भ्रमण राम्रो भएको र बाँकी कुरा उद्योग मन्त्री दामोदर भण्डारीले बोल्ने भनेर बाहिरिइन् ।

कम्युनिस्ट एकताको बारेमा सोधिएको प्रश्नको पूर्वराष्ट्रपति भण्डारीले जवाफ दिइनन् । भण्डारीको चीन भ्रमणलाई अर्थपूर्ण रूपमा हेरिएको छ ।

कतिपयले भण्डारीलाई आगामी महाधिवेशनबाट एमालेको नेतृत्वको रूपमा हेरेका छन् । एमाले नेतृत्वमा भण्डारीलाई ल्याएर कम्युनिस्ट एकता गर्ने चिनियाँ चाहना रहेको चर्चा छ ।

तर, मन्त्री भण्डारीले पनि यो भ्रमणलाई त्यो चर्चासँग जोडेर हेर्न नमिल्ने बताए ।

उनले भने, ‘अहिले त्यो सन्दर्भ यो भ्रमणमा जोड्न हुँदैन। त्यसमा पार्टी नेतृत्वले आवश्यक परामर्श गर्ला । र निर्णय गर्ला । तर यो भ्रमण सद्भाव भ्रमण मात्रै हो। उहाँको भ्रमण दलमा पार्टी र सरकारको पनि सहभागिता छ ।’