तनहुँ — देवघाट गाउँपालिका–५ बद्रीमुक्तिका ३२ वर्षीय प्रकाश पौडेलको हत्या अभियोगमा फरार रहेका एक जनालाई शनिबार बिहान प्रहरीले पक्राउ गरेको छ ।

महोत्तरी बर्दिबास नगरपालिका–१ बस्ने ४६ वर्षीय लोकबहादुर महतलाई प्रहरीले पक्राउ गरेको हो । फरार रहेका महतलाई चितवनको भरतपुर महानगरपालिका–१ स्थित रोटरी क्लबले सञ्चालन गरेको वृद्धाश्रममा लुकेर बसेको अवस्थामा पक्राउ गरिएको जिल्ला प्रहरी कार्यालय तनहुँका प्रहरी निरीक्षक आशिष विकले जानकारी दिए ।

यसअघि उक्त घटनामा संलग्न रहेको अभियोगमा पाल्पाको तानसेन नगरपालिका–८ नयाँपाटी बस्ने २८ वर्षीय बुद्धि सारु मगर र मकवानपुरको हेटौंडा उपमहानगरपालिका–३ हटिया बस्ने ४२ वर्षीय राम लामा पक्राउ परिसकेका छन् ।

बिहीबार बिहान पौडेल घरदेखि अन्दाजी तीन सय मिटरको दूरीमा रहेको कच्ची सडकमा लडिरहेको अवस्थामा स्थानीयबासीले भेटेका थिए । उनलाई तत्काल उपचारका लागि भरतपुर अस्पताल चितवन लगिएकामा उनको उपचारका क्रममा मृत्यु भएको प्रहरीले जनाएको छ ।

घटनापछि इलाका प्रहरी कार्यालय आँबुखैरेनीका प्रहरी निरीक्षक टेकप्रसाद सुवेदीको नेतृत्वमा पुगेको टोलीले सूक्ष्म रूपमा अनुसन्धान गर्दा उनीहरू मादक पदार्थ सेवन गरी झैझगडा गरेको खुल्न आएको छ । पक्राउ परेका तीन जनाले पौडेललाई कुटपिट गरेको प्रहरीले जनाएको छ ।