पोखरा । गण्डकी प्रदेशका किरातीहरूको भाषिक तथा सांस्कृतिक अवस्थाबारे पोखरामा विमर्श गरिएको छ । नेपाल प्रज्ञा–प्रतिष्ठानको सहकार्यमा किरात अध्ययन तथा अनुसन्धान केन्द्र, कास्कीको आयोजनामा एक दिने गोष्ठी सम्पन्न भएको हो ।

गोष्ठीमा कार्यपत्र प्रस्तुत गर्दै प्रदीप कुलुङले गण्डकी प्रदेशमा २०२० सालदेखि किराँत समुदायको बसोबास सुरु भएको पाइएको उल्लेख गरे । पछिल्लो समयमा गोर्खा भर्तीका कारण मगर, गुरुङ समुदायसँगको सामीप्यतासँगै गण्डकी प्रदेश त्यसमा पनि विशेषगरी पोखरा क्षेत्रमा किराँत समुदायको बसाइँसराइँ बढ्न थालेको उनले बताए ।

गोष्ठीका प्रमुख अतिथि, नेपाल प्रज्ञा–प्रतिष्ठानका साहित्य तथा मातृभाषा विभाग प्रमुख, प्राज्ञ राजन मुकारुङले यस कार्यक्रमले गण्डकी प्रदेशमा महत्वपूर्ण र ऐतिहासिक कार्यको थालनी भएको उल्लेख गरे ।

भाषा, संस्कृति जोगाउन प्रविधिसँग जोडिनु आवश्यक रहेको भन्दै उनले नयाँ पुस्तालाई आफ्नो भाषा, संस्कृतिप्रति चासो बढाउन प्रविधिमैत्री हुनु आवश्यक रहेको धारणा व्यक्त गरे ।

किराँत समुदायले जुनसुकै ठाउँमा बसोबास गरे पनि अन्य समुदायसँग सांस्कृतिक आदानप्रदान गर्नुपर्ने आवश्यकता औंल्याउँदै प्रज्ञा मुकारुङले संस्कृतिलाई जडता भन्दा पनि सौन्दर्यको हिसाबले अघि बढाउन आवश्यक रहेकोमा जोड दिए ।

गोष्ठीमा प्रस्तुत कार्यपत्रमाथि दीपेन्द्र राई, दिनेश सुब्बा र अर्जुन मान्थेर्बुले टिप्पणी गर्दै किरात समुदायको इतिहासलाई समेटेर गण्डकी प्रदेशमा किराँत समुदायको अवस्थाबारे चर्चा गर्नु सान्दर्भिक हुने भनाइ राखे ।

किराँत अध्ययन तथा अनुसन्धान केन्द्रका अध्यक्ष रामकुमार राईको अध्यक्षतामा भएको कार्यक्रममा सचिव अनुज कुलुङले सञ्चालन गरेका थिए । कार्यक्रममा विश्वहाङ राई लगायतले बोलेका थिए ।