पोखरा ५ पर्स्याङमा रहेको शान्ति निकेतन स्कूलले एसइई २०८१ मा उत्तीर्ण विद्यार्थीहरुलाई शनिवार एक समारोहकाबीच बधाई तथा सम्मान गरेको छ ।

विद्यालयले एसइई उत्तीर्ण ३९ जना विद्यार्थीलाई एकसाथ बधाई तथा सम्मान व्यक्त गरेको हो । सर्वोत्कृष्ट नतिजा ४ जीपीए ल्याउने अनुपम पराजुली र निश्चल कोइरालालाई जनही १ लाखका दरले सम्मान गरेको छ ।

अन्य विद्यार्थीलाइ पनि विद्यालयले खादा माला र मायाको चिनो दिएर सम्मान गरेको विद्यालयले जनाएको छ । विद्यालयका ३९ विद्यार्थीमध्ये विज्ञान विषयमा ३८ जनाले ४ जीपीए ल्याउन सफल भएका छन् । त्यस्तै, लेखा विषयमा २४ जना विद्यार्थी र नेपालीमा २२ जना विद्यार्थीले ४ जीपीए प्राप्त गर्न सफल भएको विद्यालयले जनाएको छ ।

सो अवसरमा विद्यालयले ४ जीपीए ल्याउने विद्यार्थीका विषयगत शिक्षकलाई पनि हौसला स्वरुप नगदसहित सम्मान गरेको छ । स्कूलका २ जना विद्यार्थीले सर्वोत्कृष्ट ४ जीपीए, ३२ जनाले उत्कृष्ट र ५ जनाले सन्तोषजनक नतिजा हाँसिल गरेका छन् ।

विद्यालयको औषत नतिजा ३.७५ भन्दा माथि रहेको विद्यालयका संस्थापक प्रीन्सिपल डा. महेश्वर पराजुलीले जानकारी दिएका छन् । माथिल्लो नतिजा ४ जीपीए र तल्लो ३.१६ भएको उनले जानकारी दिए । गत वर्ष एक जनाले ४ जीपीए ल्याएको बताउँदै यो वर्षको नतिजा विगतको भन्दा राम्रो रहेको बताए ।

अनुभवी शिक्षकशिक्षिका, अभिभावकको निरन्तर खबरदारी र चासो तथा विद्यार्थीको मेहनतले गर्दा विद्यालयले उचाई हाँसिल गर्न सफल भएको उनले दावी गरे ।

सो अवसरमा वोल्दै शिक्षा विकास समन्वय इकाई कास्कीका प्रमुख लोकनाथ आचार्यले कास्कीका संस्थागत विद्यालयहरुमा शान्ति निकेतन स्कूलको नतिजा उत्कृट रहेको बताए । उनले विद्यार्थीले लव्धाङ्कमा जसरी अंक ल्याएका छन् घर, परिवार र छिमेकमा पनि उनीहरुको व्यवहारमा उत्कृष्टता झल्किनु पर्ने बताए ।

विद्यालयका अभिभावक एवं रेडियो सराङकोटका समाचार प्रमुख कमल पौडेल अथकले शान्ति निकेतनको नतिजा पोखराका संस्थागत विद्यालय मध्ये अब्बल रहेको बताए । उनले आगामी दिनमा यो नतिजा कायम राख्दै थप प्रगति पथमा लम्किन विद्यालय परिवारलाई आग्रह गरे ।

विद्यालय व्यवस्थापन समितिका अध्यक्ष कृष्णमणि भूर्त्यालको अध्यक्षतामा भएको कार्यक्रममा बराही माविका प्रधानाध्यापक शिवप्रसाद भण्डारी, विद्यालयका सल्लाहकार सोमनाथ भूर्त्याल, समाजसेवी हेरम्वप्रसाद कोइराला, सहायक प्राचार्य यदूविलास भूर्त्याल, विद्यार्थीद्वय  अनुपम पराजुली र निश्चल कोइराला तथा सामाजिक विषयका शिक्षक हेम सुवेदी लगायतले विद्यालयको प्रगति र नतिजाको बारेमा प्रशंसा गरेका थिए ।