पोखरा महानगरपालिका वडा नम्बर १२ कार्यालयले सामाजिक सुरक्षा भत्ता नवीकरण गर्न आउने ज्येष्ठ नागरिकको निःशुल्क स्वास्थ्य परीक्षण सेवा सञ्चालन गरेको छ ।

वडाध्यक्ष सन्तोष बास्तोलाले ज्येष्ठ नागरिकको सहुलियतका लागि प्रेसर र सुगर परीक्षण सेवा निःशुल्क रूपमा प्रदान गरिरहेको बताए ।

कार्यक्रमको उद्देश्य ज्येष्ठ नागरिकको स्वास्थ्य अवस्था बुझ्न सहयोग गर्नु र समयमै आवश्यक स्वास्थ्य सेवा उपलब्ध गराउनु रहेको उनको भनाइ छ । उनले भत्ता नवीकरणजस्ता सेवा लिन आउँदा साथमा स्वास्थ्य परीक्षण सेवा पनि पाइने भए पछि वडाबासी खुसी भएको बताए ।

वडा कार्यालय परिसरमा संचालित परीक्षण सेवामा हालसम्म सयौँ ज्येष्ठ नागरिकले लाभ लिइसकेको वडासचिव शारदा सापकोटाले बताइन् । उनका अनुसार स्वास्थ्य स्वयंसेविका एवंम स्वास्थ्यकर्मीहरूको समन्वयमा जारी सेवा साउन महिनाभरि भत्ता नवीकरण कार्यक्रमसँगै जारी रहनेछ ।

यस किसिमका साना, तर प्रभावकारी कार्यक्रमले समुदायमा जनस्वास्थ्यप्रति चेतना बढाउने स्वास्थ्य स्वयंसेविका संयोजक इन्दिरा पन्तले बताइन्।