स्याङ्जाको वालिङ नगरपालिकाले सामुदायिक विद्यालयको शैक्षिक गुणस्तर अभिवृद्धि गर्ने उद्देश्यले विद्यालय शिक्षण सबलीकरण सम्बन्धी छलफल तथा अन्तरक्रिया कार्यक्रम सम्पन्न गरेको छ ।

कार्यक्रममा शिक्षण पद्धति सुधार, विद्यार्थीको सिकाइमा देखिएका चुनौतीहरू, शैक्षिक उपलब्धि अभिवृद्धि तथा प्रविधिमैत्री शिक्षण प्रणाली जस्ता विषयमा गहन छलफल गरिएको थियो । लुम्बिनी प्रदेशसभा सदस्य खड्ग बस्नेत, शिक्षाविद् कविता अर्याल, शिक्षाकर्मी तोयानारायण अर्याल तथा मिडास प्रशिक्षक विश्वराज पंगेनीले सहजीकरण गर्दै आ–आफ्ना क्षेत्रगत अनुभव प्रस्तुत गरेका थिए ।

कार्यक्रमलाई सम्बोधन गर्दै नगरप्रमुख कृष्ण खाँणले वालिङमा गुणस्तरीय शिक्षाको अभावले बसाइँसराइ बढेको उल्लेख गर्दै, विद्यालय र स्थानीय सरकार मिलेर दुई वर्षभित्र नगरलाई शैक्षिक हबका रूपमा विकास गर्ने प्रतिबद्धता जनाए ।

“अबको दुई वर्षलाई शैक्षिक सुधारको ऐतिहासिक चरण बनाऔं, विद्यालयलाई गुणस्तरीय र आकर्षक बनाउन नगर सरकार पूर्ण रूपमा तयार छ,” खाँणले भने ।

नगर उपप्रमुख कविता तिवारी गैरेले वालिङमा शैक्षिक सुधारका लागि सुरु गरिएका नवनवीन प्रयासबारे जानकारी दिइन् । उनका अनुसार सामुदायिक विद्यालयमा विद्यालय नर्स, दैनिक योग कक्षा र स्वास्थ्यमुखी अभ्यासले विद्यार्थीमा उर्जा सिर्जना गरेको छ । उनले यस वर्षदेखि विद्यार्थीमा विभेद अन्त्य गर्न एउटै पोशाक वितरण गर्ने योजना रहेको बताइन् ।

कार्यक्रममा सहभागिता जनाएका शिक्षकहरूले भौतिक पूर्वाधार र शैक्षिक सामग्री अभावलाई साझा चुनौतीका रूपमा उठाए । यहाँको लक्ष्मी माध्यमिक विद्यालयकी प्रधानाध्यापक सिता गौडेलका अनुसार, विपन्न तथा दलित परिवारका विद्यार्थी बिहान घरको काम सकेर मात्र विद्यालय आउँदा उनीहरूको पठन–पाठन दोस्रो प्राथमिकता बन्न पुग्छ, जसको असर परीक्षाफलमा समेत देखिन्छ ।

नगर शिक्षा शाखा प्रमुख ख्याम नारायण काफ्लेले आगामी दिनमा शिक्षक तालिम, नियमित अनुगमन, नवीन अभ्यास विस्तार, शैक्षिक सामग्री उत्पादन र प्रविधिको सहज पहुँच सुनिश्चित गर्ने योजना रहेको जानकारी दिए ।

वालिङ नगरपालिकाभित्र हाल बाल शिक्षा देखि कक्षा १० सम्म तीन हजार ९ सय १९ विद्यार्थी अध्ययनरत छन् । तीमध्ये १२ सय ४९ जना दलित परिवारका विद्यार्थी हुन् भने अधिकांश विद्यार्थी विपन्न वर्गका परिवारबाट आएका छन् ।

यसै सन्दर्भमा, कार्यक्रमले विद्यालय र स्थानीय सरकार मिलेर सामुदायिक शिक्षा सबलीकरणलाई प्राथमिकताका साथ अघि बढाउने निष्कर्ष निकालेको छ ।