जेन–जी आन्दोलनपछिको विषम परिस्थितिमा सुरक्षा चुनौती बढेपछि नागरिकस्तरबाटै शान्तिसुरक्षाका लागि पहल सुरु भएको छ ।

प्रहरीहरू नै तितरबितर भएको र जेलबाट ठूलो संख्यामा कैदी भागेकाले चोरी तथा लुटपाटको जोखिम बढेपछि टोल सुरक्षा समिति बनाउनेदेखि प्रहरीलाई पुनर्स्थापित गर्ने अभियान नै सुरू गरिएको छ ।

२३ र २४ भदौमा भएको जेन-जी आन्दोलनमा तोडफोड र आगजनी गरिएका प्रहरी कार्यालयमा नागरिक स्तरबाटै सहयोग प्रदान गरिन थालिएको हो ।

पोखरामा पनि कम्प्युटर एशोसिएशन नेपाल (क्यान) महासंघ कास्कीले आफ्नो सामाजिक उत्तरदायित्व अन्तर्गत जिल्ला प्रहरी कार्यालय, कास्कीलाई कम्प्युटर र प्रिन्टर हस्तान्तरण गरेको छ।

क्यान महासंघ कास्कीका अध्यक्ष पुरुषोत्तम कुँवरले प्रहरी कार्यालयका आधिकारिक व्यक्तिलाई डेस्कटप कम्प्युटर सेट र एक थान थ्री इन वान मल्टिफंक्सन प्रिन्टर हस्तान्तरण गरेका हुन्। यस सहयोगले प्रहरी कार्यालयको कम्प्युटर सम्बन्धी काम सञ्चालन गर्न सहयोग पुग्नेछ ।

क्यान महासंघ कास्कीले यसै दुःखद घटनाबाट प्रभावितप्रति गहिरो समवेदना व्यक्त गर्दै प्रहरी कार्यालयलाई आवश्यक उपकरण हस्तान्तरण गरेको हो । अध्यक्ष कुँवरले यस कदमले प्रहरी कार्यालयको प्रशासनिक कार्यसम्पादन र सेवा प्रवाहमा थप सहजता ल्याउने विश्वास व्यक्त गरे ।
‘समाजको सुरक्षाका लागि अग्रपंक्तिमा खटिने प्रहरीप्रति सहयोग गर्नु हाम्रो सामाजिक उत्तरदायित्व रहन्छ ।’ कुँवरले भने ।

उक्त हस्तान्तरण कार्यक्रममा पोखरा उद्योग वाणिज्य संघका अध्यक्ष, उपाध्यक्ष र महासचिव, क्यान महासंघका केन्द्रीय सदस्य, क्यान महासंघ कास्कीका पूर्व अध्यक्षहरू र कार्यसमितिका सदस्यहरूको उपस्थिति रहेको थियो।

आन्दोलनको आवेगमा उपत्यकाका ९० प्रतिशत प्रहरी कार्यालय आक्रमणमा परेका छन् । कास्कीमा पनि जिल्ला प्रहरी कार्यालयमा ठूलो क्षति पुग्यो । वडा प्रहरी कार्यालय बगर पनि पूर्ण रुपमा क्षति भएको छ ।

प्रहरीका गाडी जलेका छन् । हतियारदेखि पोसाकसम्म लुटिएपछि प्रहरी ड्युटीमा खटिन असहज अवस्था छ ।