काठमाडौं । सपथको अन्तिम समयमा अभियन्ता खगेन्द्र सुनार गणपतिलाल श्रेष्ठको नाम मन्त्री हुने लिष्टबाट हटाइएको छ ।

प्रधानमन्त्री सुशीला कार्कीले आइतबार ४ जना मन्त्री थपेर मन्त्रिपरिषद् विस्तार गर्न लागेकी थिइन् । तर, सुनारको नाम विवादमा परेपछि उनीहरुको नाम हटाइएको हो ।

श्रममन्त्रीमा सिफारिस सुनारविरुद्ध अदालतमा चलेका मुद्दा विचाराधीन रहेको तथ्य बाहिर आएपछि उनको नियुक्ति रोकिएको हो ।

यस्तै, भूमि सुधार मन्त्रीमा सिफारिस भएका श्रेष्ठले पनि दिइएको मन्त्रालयमा चित्त नबुझाएपछि शपथ नभएको हो । प्रधानमन्त्री कार्यालय स्रोतका अनुसार श्रेष्ठले पर्यटन मन्त्रालयको आकंक्षा राखेका थिए । तर प्रधानमन्त्री कार्कीले उनलाइ भूमी मन्त्रीमा सिफारिस गरेकी थिइन् । जसमा श्रेष्ठले असन्तुष्टी जनाएको बताइएको छ ।

स्वास्थ्य तथा जनसंख्या मन्त्रीमा डा. सुधा शर्मा गौतम र युवा तथा खेलकुद मन्त्रीमा बब्लु गुप्ता सिफारिस भए । उनीहरूको मात्र आइतबार शपथग्रहण गराइएको छ ।

डा. सुधा पूर्व स्वास्थ्य सचिव हुन् भने बब्लु ‘१०० ग्रुप’ का अध्यक्ष हुन्।