स्याङ्जाको आँधीखोला गाउँपालिकामा दूध सङ्कलन केन्द्र सञ्चालनमा ल्याइएको छ । बाङ्सिङ साना कृषि सहकारी संस्था लिमिटेडसँगको सहकार्यमा पालिकाले उत्पादन-आधारित अनुदानस्वरूप कृषकलाई सीधा सहयोग पुर्‍याउने तयारी गरेको हो ।

गाउँपालिकाको सहयोग र बाङ्सिङ साना कृषि सहकारी संस्था लिमिटेडले बजारीकरण गर्नेगरी दूध संकलन केन्द्र सञ्चालनमा ल्याइएको हो । सहकारीले किसानबाट दैनिक उत्पादन हुने दूध सङ्कलन गरेर केन्द्रमा राख्नेछ । त्यही तथ्याङ्कका आधारमा पालिकाले दूधमा प्रति लिटर चार रुपैयाँ अनुदान वितरण गर्ने व्यवस्था मिलाएको छ ।

गाउँपालिकाका छ वटा वडाबाट हाल दैनिक करिब १००० लिटर दूध सङ्कलन भइरहेको गाउँपालिका अध्यक्ष विश्व पौडेलले जानकारी दिए । गाउँमै उत्पादन हुने दूध एकै ठाउँमा सङ्कलन र वितरण हुने भएपछि किसानलाई बिक्रीका लागि धाउनुपर्ने झन्झट कम हुने र आम्दानी बढ्ने अध्यक्ष पौडेलको विश्वास छ ।

दूध सङ्कलन केन्द्र स्थापनासँगै किसानहरू व्यवसायप्रति थप आकर्षित भएको गाउँपालिका अध्यक्ष पौडेलले बताए । “किसानलाई सहज बनाउने उद्देश्यले केन्द्र सञ्चालनमा ल्याएका हौं, गाउँमै उत्पादन भएकै दूध गाउँमै बिक्री हुँदा कृषकलाई ठूलो राहत पुग्नेछ,” अध्यक्ष पौडेलले भने ।

गाउँपालिका अध्यक्ष पौडेलले सङ्कलन केन्द्र सञ्चालनमा आएपछि किसान विचौलियाबाट ठगिने प्रवृत्ति घट्ने भन्दै उत्पादन, प्रशोधन र बजार विस्तारमा सहकारीले महत्वपूर्ण भूमिका खेल्ने बताए । पौडेलले आवश्यकताअनुसार पोखरामा छुट्टै बिक्री कक्ष सञ्चालन गर्ने तयारी समेत भइरहेको जानकारी दिए ।

पालिकाले पाँच हजार लिटर क्षमता भएको चिलिमे भ्याट, पाँचवटा मिल्क एनालाइजर, पाँचवटा डिफ्रीज र ५० थान दूध क्यान उपलब्ध गराएर केन्द्रलाई पूर्ण रूपमा सञ्चालनयोग्य बनाएको छ ।

पालिकाले कृषकलाई एकीकृत गर्दै कृषि तथा पशुपालनबाट आयआर्जन बढाउने अभियान सञ्चालन गरिरहेको छ । किसानलाई उत्पादन, प्रशोधनदेखि बजार विस्तारसम्म सहज गराउने उद्देश्यसहित सुरु गरिएको दूध सङ्कलन केन्द्रले गाउँमा दुध व्यवसाय प्रति नयाँ आशा समेत जगाएको छ ।