राष्ट्रिय स्वतन्त्र पार्टी (रास्वपा) का स्याङ्जा क्षेत्र नं. २ का उम्मेदवार झविलाल डुम्रेले फागुन २१ गते हुने प्रतिनिधि सभा निर्वाचनलाई लक्षित गर्दै आफ्नो चुनावी प्रतिबद्धता सार्वजनिक गरेका छन् ।

सार्वजनिक गरिएको प्रतिबद्धतामा उनले सुशासन, भ्रष्टाचार नियन्त्रण, पूर्वाधार विकास, कृषि प्रवर्द्धन तथा नागरिकका आधारभूत आवश्यकतालाई प्राथमिकतामा राखेको बताएका छन् । भ्रष्टाचार विरुद्ध शून्य सहनशीलताको नीति अवलम्बन गर्ने, संसदीय बहसदेखि नीतिनिर्माण र कानुन संशोधनसम्म नागरिकका मुद्दालाई केन्द्रमा राख्ने उनको प्रतिबद्धता छ । उनले युवापुस्ताले उठाएका सवाललाई पूर्ण रूपमा आत्मसात् गर्ने पनि बताएका छन् ।

डुम्रेले स्याङ्जालाई सुन्तला र कोदोको विशेष उत्पादन क्षेत्रका रूपमा विकास गर्ने लक्ष्य लिएको उल्लेख गरेका छन् । कृषकले उत्पादन गरेको वस्तुको बजारीकरण सुनिश्चित गर्ने योजना अघि सार्दै कृषि क्षेत्रलाई आत्मनिर्भर र व्यावसायिक बनाउने धारणा उनले व्यक्त गरेका छन् ।

बाँदर आतंकको दीर्घकालीन समाधानका लागि आधुनिक प्रविधि, वैज्ञानिक वन व्यवस्थापन र व्यवहारिक नियन्त्रणको मोडेल लागू गर्न पहल गर्ने प्रतिबद्धता पनि उनले जनाएका छन् । शिक्षामा गुणस्तर र पहुँच विस्तार, राजनीतिक हस्तक्षेप अन्त्य तथा आवश्यक नीतिगत सुधारमार्फत सुधार ल्याउने योजना उनको वाचापत्रमा समेटिएको छ । प्रत्येक पालिकामा कम्तीमा एक प्राविधिक शिक्षालय स्थापना गर्ने तथा सरकारी विद्यालयको संरचनात्मक सुधारमा जोड दिने उनले बताएका छन् ।

सडक पूर्वाधारतर्फ सिद्धार्थ राजमार्ग तथा सहायक मार्गहरूको स्तरोन्नति, सडक दुर्घटना न्यूनीकरणका लागि वैज्ञानिक सडक सुधार र प्रभावकारी ट्राफिक सुरक्षा नीतिमा विशेष ध्यान दिने प्रतिबद्धता पनि सार्वजनिक गरिएको छ ।

यसैबीच, डुम्रेले नागरिक करारपत्रसमेत सार्वजनिक गरेका छन् । मतदाताको आर्थिक अवस्था सुधार गर्ने नीति तथा कार्यविधि निर्माणमा असफल भए पार्टीको विधानअनुसार आफू पदबाट फिर्ता हुने प्रतिवद्धता उनले व्यक्त गरेका छन् । रास्वपाको स्थापनाकालदेखि संगठन विस्तारमा सक्रिय रहेका डुम्रे व्यवसायीसमेत हुन् ।