काठमाडौँ- पोखरामा एलपी ग्यास लुकाउने एउटा व्यापारिक प्रतिष्ठानलाई स्थानीय प्रशासनले ५० हजार रुपैयाँ जरिवाना गरेको छ।

जिल्ला प्रशासन कार्यालय कास्कीको टोलीले अनुगमनका क्रममा ग्यास लुकाएर कृत्रिम अभाव खडा गरेको भन्दै पोखरा– ६ जरेवरस्थित भण्डारी ट्रेडर्सलाई ५० हजार रुपैयाँ जरिवाना गरेको हो।

कास्कीका प्रमुख जिल्ला अधिकारी रूद्रादेवी शर्माका अनुसार उक्त डिलरले ४८ थान १४.२ केजीका ग्यास सिलिण्डर लुकाएर कृत्रिम अभाव खडा गरेको पाइएकाले जरिवाना तिराएको बताइन्।

उक्त डिलरमा एउटा सिलिण्डरबाट अर्को सिलिण्डरमा ग्यास सार्ने उपकरण पनि फेला परेको प्रजिअ शर्माले जानकारी दिइन्।

अनुगमन टोलीले पोखराका ग्यास डिलरहरूलाई ग्यासको कृत्रिम अभाव खडा नगर्न, ग्यासको परिणाम परिमार्जन नगर्न र उपभोक्ताको हित विरूद्धका गतिविधि नगर्न निर्देशनसमेत दिएको छ।

कास्कीका सहायक सिडिओ एवं निरीक्षण अधिकृत शिव लम्साल र अर्का सहायक सिडिओ चित्रांगत बराल नेतृत्वमा उपभोक्ता अधिकारकर्मी लगायतको टोलीले पोखराका ५ वटा ग्याँस डिलरहरूको अनुगमन गरेको थियो।