स्याङ्जामा युवा मुक्तककार मुनाल गोदार क्षेत्रीको पहिलो साहित्यिक कृति ‘मुनाल (बतासे प्रेम)’ मुक्तकसङ्ग्रह लोकार्पण गरिएको छ । कृतिको लोकार्पणसँगै परिचर्चा तथा सिर्जना वाचन कार्यक्रम पनि सम्पन्न गरिएको हो ।

साहित्यिक पुनर्जागरणको आठौँ वर्ष प्रवेशको अवसर पारेर भीरकोट नगरपालिका–७ को आयोजनामा कालिका पुस्तकालय, बलमाटामा कार्यक्रम गरिएको थियो ।

कार्यक्रममा साहित्यिक अभियन्ता मिलन समीर, युवा स्रष्टा शम्भु अर्याल र मनिषा कोइरालाले कृतिमाथि समीक्षा प्रस्तुत गरेका थिए । वक्ताहरूले नयाँ पुस्ताका स्रष्टालाई साहित्यमा सक्रिय बनाउन यस्ता कृतिले सकारात्मक ऊर्जा दिने बताएका थिए ।

नेपाली लेखक सङ्घ स्याङ्जाले प्रकाशन गरेको उक्त कृति मुनाल गोदार क्षेत्रीको पहिलो प्रकाशित पुस्तक हो । मिलन समीरको सम्पादनमा तयार पारिएको पुस्तकमा समसामयिक विषयवस्तुसँग सम्बन्धित ८३ वटा मुक्तक समेटिएका छन् । पुस्तकमा प्रत्येक मुक्तकअनुसार विषय सुहाउँदा रेखाचित्र समेत समावेश गरिएको छ ।

कार्यक्रममा स्याङ्जाली स्रष्टाहरू नुवादत्त अर्याल, लेखबहादुर केसी ‘किरण’, यामप्रसाद अधिकारी (लक्ष्मण), छायाराम खनाल, वसन्त खनाल, दिलीप तिवारी, खगेन्द्रजंग थापा, डिल्लीराम भण्डारी, अमित सुनार, सुदीक्षा सुनार, सक्षम रोका, उषा सुनार, इशाना रोका, सरगम थापा, गुरुप्रसाद ढकाल, चण्डिकाप्रसाद भट्टराई, हरिप्रसाद पङ्गेनी, बबिन पाठक, लीला रेग्मी, लेखनाथ काफ्ले, पारिश्वर न्यौपाने र ध्रुवप्रसाद शर्मा पङ्गेनीले आफ्ना रचना वाचन गरेका थिए ।

सहभागीहरूले जिल्लामा साहित्यिक गतिविधि निरन्तर बढ्दै गएको भन्दै यस्ता कार्यक्रमलाई निरन्तरता दिनुपर्ने धारणा राखेका थिए ।