राउटे समुदायका मानिस जङ्गलमै घुमन्ते जीवन बिताउने भन्ने आम बुझाइबीच एक युवक भने प्राविधिक शिक्षा अध्ययनका लागि जिल्लाबाहिर आइपुगेका छन् ।

डडेलधुराको परशुराम नगरपालिका–१२ का १८ वर्षीय लक्ष्मणसिंह राउटे अहिले स्याङ्जाको चापाकोट नगरपालिकामा सिभिल इन्जिनियरिङ अध्ययन गरिरहेका छन् ।

लोपोन्मुख राउटे समुदायबाट प्राविधिक शिक्षा अध्ययन गर्न आउनु आफैंमा फरक विषय बनेको छ । लक्ष्मणले प्राविधिक शिक्षा तथा व्यावसायिक तालिम परिषद् (सिटिइभिटी) अन्तर्गत स्याङ्जाको चापाकोट नगरपालिका–१० मा रहेको किसान बहुप्राविधिक शिक्षालयमा सिभिल इन्जिनियरिङ इन डिप्लोमा अध्ययन गरिरहेका हुन् ।

सामान्य साक्षरता पनि चुनौतीपूर्ण मानिने समुदायबाट आएका लक्ष्मण छात्रवृत्तिमा अध्ययन गरिरहेका छन् । शिक्षालय प्रमुख शिव पाण्डेका अनुसार पछिल्लो समय ‘पढ्दै कमाउँदै’ गर्ने अवसरका कारण विद्यार्थीको आकर्षण प्राविधिक शिक्षातर्फ बढ्दो छ । लक्ष्मणले पनि मेहनत र क्षमताका आधारमा छात्रवृत्ति प्राप्त गरेर अध्ययन सुरु गरेका हुन् ।

प्राविधिक शिक्षा सस्तो, व्यवहारिक र पढाइपछि रोजगारीको सम्भावना धेरै हुने भएकाले विद्यार्थीको रोजाइमा पर्न थालेको पाण्डेको भनाइ छ । शिक्षालयमा हाल करिब २५० विद्यार्थी अध्ययनरत छन् । त्यसमध्ये सुदूरपश्चिम र कर्णाली प्रदेशका विद्यार्थीको संख्या उल्लेख्य रहेको जनाइएको छ ।

लक्ष्मणले स्थानीय पालिकाको सहयोगपछि आफ्नो प्राविधिक शिक्षा पढ्ने सपना पूरा भएको बताए । उनले आफ्नो समुदायमा पहिलो पटक स्नातक तह उत्तीर्ण गर्ने व्यक्ति आफ्नै बुवा दानबहादुर राउटे भएको उल्लेख गर्दै बुवाकै प्रेरणाले आफू पढाइतर्फ लागेको सुनाए ।

उनको परिवारमा आमा, तीन बहिनी र कान्छी आमातर्फका एक भाइ छन् । परम्परागत जीवनशैलीबाट बाहिर निस्केर प्राविधिक शिक्षा अध्ययन गरिरहेका लक्ष्मण अहिले धेरैका लागि उदाहरण बन्न थालेका छन् ।