स्याङ्जाको गल्याङ नगरपालिका -११ तुलसी भञ्ज्याङ्स्थित सिद्धार्थ राजमार्ग भासिँदा सडक अवरुद्ध भएको छ । यद्यपि वालिङ् बजारदेखि पोखरासम्मको सडकमा भने यात्रा गर्न सकिने भएको छ ।

निरन्तर परेको अविरल वर्षाका कारण राजमार्ग भासिँदा सुनौली-पोखरा सडक अवरुद्ध भएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए । उनले वर्षाका कारण राजमार्ग झण्डै ५० मिटर भासिएको बताए ।

लगातार वर्षा भइरहेकोले सडक तत्काल निर्माण गरी सुचारू गर्न कठिनाई रहेको प्रहरी कार्यालयले जनाएको छ । सडक अवरुद्ध हुँदा सवारीसाधन तथा यात्रुहरु अलपत्र परेका छन् ।

यद्यपि सिद्धार्थ राजमार्ग अन्तर्गत वालिङ् बजारदेखि पोखरासम्मको अवरुद्ध सडक सुचारू गरी संचालनमा ल्याइएको छ भने पहिरो खस्ने क्रम रोकिएको छैन । अविरल वर्षाका कारण गएका पहिरोले भित्री सडकखण्डहरु प्रायः सबै अवरुद्ध रहेका छन् ।