जिल्ला प्रशासन कार्यालय स्याङ्जाले गत असार २२ र २३ गते गएको बाढी पहिरोबाट पूर्णरूपमा घर क्षति पुगेका यहाँका नौ परिवारलाई राहत प्रदान गरेको छ । प्रदेश सरकारको १० हजार र सङ्घीय सरकारको १५ हजार गरी २५ हजारको दरले राहत प्रदान गरिएको हो ।

प्रशासनले अर्जुनचौपारी गाउँपालिकाका चार र आँधीखोला गाउँपालिकाका पाँच परिवारलाई राहतस्वरूप नगद प्रदान गरेको हो । क्षति पुगेका मध्ये अर्जुनचौपारी–१ का गुरुप्रसाद दमै, टेकप्रसाद खत्री, रञ्जीता खत्री र वडा नं–३ की सरस्वती दमैलाई वडा नं–१ को कार्यालयमा पुगेर राहत प्रदान गरिएको हो ।

यस्तै, आँधीखोला गाउँपालिका–१ का यामकुमारी केसी, यामनारायण अधिकारी, रनबहादुर सुनार, लालबहादुर सुनार र तेजबहादुर सुनारलाई सहायक प्रमुख जिल्ला अधिकारी दीपक पौडेलले वडा कार्यालयमा पुगेर राहत पदान गरेका हुन् । आँधीखोला–४ मा अझ एक जनालाई राहत दिन बाँकी रहेको पौडेलले जानकारी दिए ।

पालिकाहरुले ढिला विवरण पठाउँदा बेलैमा राहत दिन नसकेको बताउँदै पौडेलले ढिलै भए पनि राहत आएको र दिएको बताए ।

यस्तै, सप्रजिअको टोलीले अर्जुनचौपारीका चारवटा किराना पसलमा अनुगमन समेत गरेको हो । अनुगमनमा दुईवटा पसलमा चार हजार ८९५ रुपियाँ बराबरको म्याद नाघेका तथा अखाद्य वस्तु भेटिएको र जफत गरी नष्ट गरेको पौडेलले बताए ।