स्याङ्जाको पुतलीबजार नगरपालिका -४ का वडा अध्यक्ष शिव बहादुर थापा २०८० भदौ १५ गते स्वास्थ्य उपचारका लागि अन्यत्र देशमा जाने बताउँदै वडा सदस्य लिलावती पौडेललाई कार्यवाहकको जिम्मेवारी दिएर हराएका छन् । वडा अध्यक्ष थापा दुई वर्ष बित्दासमेत फर्किएका छैनन् ।

महिला वडा सदस्य लिलावती पौडेलले सुरुमा उपचारका लागि बाहिर जाने कारण बताइएकोले २०८० भदौ १५ गतेदेखि कार्यवाहक सम्हालिन् । तर केही दिनमै थापा अमेरिका पुगे । “स्वास्थ्य उपचारका लागि बाहिर जानुपर्ने भएकाले वडा अध्यक्षको जिम्मेवारी मलाई दिनुभयो,” पौडेलले भनिन्, “तर केही समयपछि गाउँमै अमेरिका पुगेको हल्ला चल्यो ।”

पौडेलले अधिकांश जिम्मेवारी आफ्नै काँधमा परेको र नबुझेका विषय पनि आइरहेको बताउँदै यसबारे कानुनी सल्लाहकारसँग बुझ्दा वडा अध्यक्षजस्तो अधिकार नहुने भन्ने बताइन् ।

पौडेलले भनिन्, “कार्यवाहकलाई पनि अर्को कार्यवाहक दिनुपर्ने स्थिति पर्नु रमाइलो होइन रहेछ । कहिलेकाहीँ व्यक्तिगत वा घरायसी कारणले केही समय बस्नुपरे पनि जनताको काम रोकिएला कि भन्ने चिन्ता बढ्छ । त्यसमाथि म त वडा नै कहिल्यै छोडेर गएको पनि छैन ।”

थापा वडा सदस्य लिलावती पौडेललाई कार्यवाहक वडा अध्यक्ष भई दैनिक कार्यसम्पादन गर्न अधिकार प्रत्यायोजन गरेलगत्तै पालिकाको नियमित कामकाजमा अनुपस्थित छन् । यस विषयमा नगरपालिका प्रमुख तुलसीराम रेग्मीले, थापा कहाँ छन् भन्ने आफूलाई समेत जानकारी नभएको बताउँछन् ।

तर, थापा अमेरिका पुगेपछि पनि उनको नेपालस्थित बैंक खातामा सेवासुविधा जम्मा भएको तथ्य बाहिर आएको छ । नगरपालिकाले २०८० भदौदेखि २०८१ असार महिनासम्मको अवधिभित्र यातायात, पत्रपत्रिका, मोबाइल रिचार्ज, अतिथि सत्कार, समन्वय सहजीकरण, बैठक तथा अनुगमन लगायतमा कूल २ लाख ७६ हजार १९० रुपैयाँ भुक्तानी गरेको हो ।

पुतलीबजारका प्रमुख प्रशासकीय अधिकृत धर्मराज ढुङ्गानाले आफू कार्यालयमा हाजिर हुन आएसङ्गै वडा अध्यक्ष थापा नगरको सम्पर्कमा नरहेको थाहा पाएपछि २०८१ साउनदेखि नै उनको सेवासुविधा रोकिएको जानकारी दिए । वडा अध्यक्ष थापाको खातामा यसअघि गएको रकम महालेखाले बेरुजु देखाएपछि पालिकाको खातामा फिर्ता आएको प्रमुख प्रशासकीय ढुङ्गानाले बताए । ढुङ्गाना २०८१ असोज २१ गतेदेखि कार्यालय प्रमुखको जिम्मेवारीमा आएका थिए । उनी हालसम्म कार्यरत छन् ।

थापा नेपाली काङ्ग्रेसबाट वडा अध्यक्षमा निर्वाचित भएका हुन् । नेपाली काङ्ग्रेसका नगर सभापति सुरज कुमार अधिकारीले थापाले पार्टीलाई कुनै पनि जानकारी नदिई अमेरिकातिर गएको बताए । उनका अनुसार, थापा हालसम्म पनि पार्टिको सम्पर्कमा आएका छैनन् । नगर सभापति अधिकारीले थापा नगर कमिटीदेखि पार्टीको कुनै औपचारिक पदमा नरहेको पनि स्पष्ट पारे ।