स्याङ्जामा गत फागुनमा सम्पन्न प्रतिनिधिसभा सदस्य निर्वाचनमा प्रत्यक्षतर्फ उम्मेदवारी दिएका सबै उम्मेदवारले आफ्नो निर्वाचन खर्च विवरण जिल्ला निर्वाचन कार्यालयमा बुझाएका छन् ।

प्रतिनिधिसभाका दुई निर्वाचन क्षेत्र रहेको स्याङ्जामा क्षेत्र नम्बर १ मा ११ दल र एक स्वतन्त्र तथा क्षेत्र नम्बर २ मा १० दल र दुई स्वतन्त्रसहित दुवै क्षेत्रमा १२/१२ जना उम्मेदवार चुनावी मैदानमा थिए । निर्वाचन परिणाम घोषणा भएको ३५ दिनभित्र खर्च विवरण बुझाउनुपर्ने कानुनी व्यवस्था अनुसार सबै २४ जनाले समयमै विवरण पेश गरेका हुन् ।

जिल्ला निर्वाचन कार्यालय स्याङ्जाका अनुसार क्षेत्र नम्बर १ को अन्तिम मत परिणाम फागुन २३ गते र क्षेत्र नम्बर २ को फागुन २४ गते घोषणा गरिएको थियो । उम्मेदवारहरूले कार्यालयमा खर्च विवरण बुझाउनुका साथै केहीले सामाजिक सञ्जालमार्फत पनि सार्वजनिक गरेका छन् ।

उम्मेदवारहरूले मनोनयन दर्ता, मतदाता नामावली छपाइ, फोटोकपी, प्रचारप्रसार, मतदाता प्रशिक्षण, सम्पर्क कार्यालय सञ्चालन, स्टेशनरी तथा सञ्चारलगायत शीर्षकमा खर्च गरेको उल्लेख गरेका छन् ।

क्षेत्र नम्बर १ मा सबैभन्दा बढी नेपाली कांग्रेसका भरतराज ढकालले २७ लाख ९ हजार ६६ रुपैयाँ खर्च भएको विवरण पेश गरेका छन् । सबैभन्दा कम नेशनल रिपब्लिक नेपालका अर्जुनकुमार गुरुङले ९ हजार ९ सय ३१ रुपैयाँ खर्च देखाएका छन् ।

त्यसैगरी नेकपा एमालेका मिनप्रसाद गुरुङले २० लाख ५३ हजार ५ सय ५५, राष्ट्रिय स्वतन्त्र पार्टीका डा. धनञ्जय रेग्मीले १९ लाख ४० हजार, नेकपाका शैलेन्द्र रेग्मीले ३ लाख ५ हजार ४ सय १८ रुपैयाँ खर्च गरेका छन् । अन्य उम्मेदवारहरूको खर्च पनि लाखदेखि हजारसम्म रहेको कार्यालयले जनाएको छ ।

क्षेत्र नम्बर २ मा भने राष्ट्रिय स्वतन्त्र पार्टीका झविलाल डुम्रेले सबैभन्दा बढी १४ लाख २६ हजार ५ सय ९६ रुपैयाँ खर्च भएको विवरण बुझाएका छन् । सबैभन्दा कम स्वतन्त्र उम्मेदवार सागर थापा मगर र जय मातृभूमि पार्टीका धनबहादुर थापाले १०/१० हजार रुपैयाँ मात्रै खर्च देखाएका छन् ।

यसै क्षेत्रमा नेकपा एमालेका खिमबहादुर थापाले १४ लाख २१ हजार १ सय ८०, नेपाली कांग्रेसका भागवतप्रकाश मल्लले १० लाख ४० हजार १५, नेकपाका पदमबहादुर विकले ६ लाख ७८ हजार ४ सय ५० रुपैयाँ खर्च विवरण पेश गरेका छन् ।

जिल्ला निर्वाचन अधिकारी श्रीराम थापाका अनुसार सबै उम्मेदवारले कानुनअनुसार तोकिएको समयभित्र खर्च विवरण बुझाएकाले प्रक्रिया पूर्ण भएको छ ।