स्याङ्जामा एक ट्याक्सी चालकले सडकमा भेटिएको सुनका गरगहनासहितको झोला सम्बन्धित व्यक्तिलाई फिर्ता गरेपछि उनको इमान्दारिताको चर्चा सुरु भएको छ ।

शनिबार दिउँसो पुतलीबजार नगरपालिका–१० राङखोला निवासी ३२ वर्षीया अनिता अधिकारी स्कुटरमा स्याङ्जाबाट पोखरा जाँदै थिइन् । छोरीसहित यात्रा गरिरहेकी उनले पछाडि २/३ वटा झोला राखेकी थिइन् । सोही क्रममा सुनका गरगहनासहितको एक झोला सिद्धार्थ राजमार्गमा खसेको थियो । झोला हराएको थाहा पाएपछि उनले जिल्ला प्रहरी कार्यालय स्याङ्जामा खबर गरेकी थिइन् ।

यता, स्याङ्जा–पोखरा रुटमा ट्याक्सी चलाउँदै आएका लोकबहादुर थापाले पुतलीबजार नगरपालिका–३ मजुवा क्षेत्रमा उक्त झोला भेट्टाएपछि प्रहरीलाई जानकारी गराएका थिए ।

प्रहरीका अनुसार झोलाभित्र सिक्री २ तोला, हार १ तोला, बेरुवा २ थान, पोतेसहितको सुनको माला १ थान र चन्द्रमा १ थान रहेको थियो । आइतबार बिहान जिल्ला प्रहरी कार्यालयमा चालक थापाले उक्त सामान अधिकारीलाई बुझाएका हुन् ।

निमित्त प्रहरी प्रमुख प्रहरी नायब उपरीक्षक प्रसन्न राज चौधरीले थापाको इमान्दारिताको प्रशंसा गर्दै भने, “तपाईंको इमान्दारिताप्रति मलगायत सिंगो प्रहरी कार्यालय नतमस्तक छ ।”

हालको बजार मूल्यअनुसार झोलाभित्र रहेका गरगहनाको मूल्य करिब १८ लाख रुपैयाँ बराबर पर्ने प्रहरीले जनाएको छ । स्थानीयवासीले पनि चालक थापाको कामलाई उदाहरणीय भन्दै प्रशंसा गरेका छन् ।