गोरखा, १६ वैशाख । गण्डकी प्रदेशका प्रमुख डिल्लीराज भट्टले मुलुकको समग्र विकासमा मुस्लिम समुदायको योगदानको सम्मान गरेका छन् ।

सबै नेपालीहरूबीच भाइचारा, सद्भाव र समानताको भावना अझ प्रगाढ बनाउन जरूरी रहेको भन्दै उनले मुस्लिम समुदायको शिक्षा, स्वास्थ्य र सामाजिक–आर्थिक अवस्था सुधार गर्न सबै पक्षले प्रयास गर्नुपर्नेमा जोड दिए ।

मुस्लिम आयोगले गोरखामा आयोजना गरेको कार्यक्रममा प्रमुख अतिथि भट्टले विविधतायुक्त नेपाली समाज नै हाम्रो साझा सम्पत्ति रहेको बताए ।

उनले भने – ‘नेपाल बहुजातीय, बहुधार्मिक तथा बहुसांस्कृतिक मुलुक हो । यहाँका सबै समुदायमा सदियौँदेखि आपसी सद्भाव र सहिष्णुता रहँदै आएको छ । नेपाली समाज भित्र एकआपसमा एकता र मैत्रीपूर्ण वातावरण छ । नेपालमा मुस्लिम समुदाय एक महत्वपूर्ण समुदाय हो। यहाँ सदियौंदेखि मुस्लिम समुदायको उपस्थिति रहेको छ।’

ईस्लाम धर्मावलम्बीहरू अल्पसंख्यक रहेतापनि यो समुदायको अलग्गै पहिचान रहेको भन्दै भट्टले मुस्लिम समुदायले व्यापार, कला, संगीत, सौन्दर्य र खानपानमा अद्वितीय योगदान पुर्‍याएको उल्लेख गरे ।

परम्परागत शैक्षिक व्यवस्थाको रुपमा रहेको मदरसा शिक्षालाई सुदृढ र संस्थागत गर्न जरुरी देखिएको र मदरसा शिक्षालाई राष्ट्रिय मापदण्ड अनुसार र औपचारिक शिक्षाको समकक्षता र पद्धतिमा ल्याउन ठोस कार्यक्रमहरुको अझै आवश्यकता देखिएको उनको भनाई छ ।

‘राज्यले मुस्लिम समुदायलाई केही आरक्षणको व्यवस्था गरेको छ । यद्यपि, राज्य संयन्त्रका विभिन्न निकायबाट सञ्चालित लक्षित कार्यक्रमहरुको पहुँच मुस्लिम समुदायका विपन्न नागरिकसम्म पुग्न बाँकी नै रहेको पाइन्छ।’ उनले भने – ‘मुस्लिम समुदायको आर्थिक, सामाजिक, साँस्कृतिक लगायतका क्षेत्रमा सशक्तीकरण आवश्यक छ । उनीहरूको क्षमता तथा नेतृत्व विकासले मात्र समतामुलक समाज निर्माणमा टेवा पुग्दछ ।’

कार्यक्रममा आयोगका कार्यवाहक अध्यक्ष महमदिन अली लगायतले बोलेका थिए ।