स्याङ्जाको वालिङस्थित पायोनिअर एजुकेसन एकेडेमीले प्राविधिक शिक्षातर्फ उल्लेखनीय उपलब्धि हासिल गर्दै गण्डकी प्रदेशमै आफूलाई अब्बल सावित गरेको छ । हेल्थ असिस्टेन्ट (एचए) कार्यक्रम अन्तर्गत विद्यालयले उत्कृष्ट नतिजा ल्याएपछि यसको चर्चा बढेको हो ।

गत भदौमा प्राविधिक शिक्षा तथा व्यावसायिक तालिम परिषद् (सिटिइभिटी)ले लिएको परीक्षामा सहभागी ३२ विद्यार्थीमध्ये ३१ जना सफल भएका छन् । विद्यालयका प्रधानाध्यापक मेघराज गैह्रेका अनुसार यो नतिजा झण्डै ९७ प्रतिशत उत्तीर्ण दर हो, जुन प्रदेशकै उत्कृष्टमध्येमा पर्छ ।

उनले यस्तो उपलब्धिले विद्यालयको शैक्षिक वातावरण, अनुशासन र प्राविधिक शिक्षामा गरिएको निरन्तर मेहनतलाई पुष्टि गरेको बताए । “यो नतिजा केवल संयोग होइन, हाम्रो टिमको दीर्घकालीन प्रयासको परिणाम हो,” गैह्रेको भनाइ छ ।

पछिल्लो समय प्राविधिक शिक्षातर्फ विद्यार्थीको आकर्षण तीव्र रूपमा बढिरहेको विद्यालयका प्राविधिक शिक्षा कार्यक्रम प्रमुख हिमनिधि पंगेनीले बताए । सोही मागलाई मध्यनजर गर्दै विद्यालयले गत वर्षदेखि हेल्थ असिस्टेन्ट कार्यक्रम सुरु गरेको थियो ।

वि.सं. २०४४ मा स्थापना भएको यो संस्थाले २०५४ सालदेखि प्राविधिक तथा व्यावसायिक शिक्षा औपचारिक रूपमा सञ्चालन गर्दै आएको छ । अहिलेको नतिजाले विद्यालयलाई गण्डकी प्रदेशमा पहिलो र देशभर दोस्रो स्थानमा उभ्याएको दाबी गरिएको छ ।

करिब तीन दशकअघि स्याङ्जामै पहिलो पटक प्राविधिक शिक्षा सुरु गरेको यस विद्यालयमा अहिले स्याङ्जासँगै पाल्पा, गुल्मी र पर्वतका विद्यार्थी अध्ययन गरिरहेका छन् । स्थानीय अभिभावक र विद्यार्थीको आवश्यकतालाई ध्यानमा राख्दै कार्यक्रम विस्तार गर्दै आएको विद्यालयले जनाएको छ ।