राष्ट्रिय स्वतन्त्र पार्टी (रास्वपा) स्याङ्जाको प्रथम जिल्ला अधिवेशनबाट रुक्मागत भण्डारी (विश्वास) पुनः जिल्ला सभापतिमा निर्वाचित भएका छन् ।

शनिबार पुतलीबजार नगरपालिका-१ स्थित सिटीहलमा सम्पन्न अधिवेशनमा लामो समयसम्म सर्वसम्मतिको प्रयास गरिए पनि सहमति जुट्न नसकेपछि सभापति र उपसभापति पदका लागि निर्वाचन भएको थियो ।

सभापति पदका अन्तिम प्रतिस्पर्धामा रहेका उपेन्द्र अर्याललाई २६० मतान्तरले पराजित गर्दै भण्डारीले नेतृत्व दोहोर्याएका हुन् । सभापतिमा भण्डारीले खसेको ३१४ मतमध्ये २८४ मत प्राप्त गर्दै विजयी भएका हुन् । उनका प्रतिस्पर्धी उपेन्द्र अर्यालले २४ मत प्राप्त गर्दा ६ मत बदर भएको निर्वाचन समितिले जनाएको छ । यसअघि भण्डारी नै जिल्ला सभापतिको जिम्मेवारीमा थिए ।

यस्तै, चार जनाको उम्मेदवारी परेको उपसभापति पदमा उमा फुयाल १४५ मतसहित विजयी भएकी छन् । उनीसँग प्रतिस्पर्धामा रहेका श्रीराम घिमिरेले १००, शान्ता अर्यालले ३३ र रामप्रसाद भुसालले २६ मत प्राप्त गरेका थिए । फुयालले आफ्ना प्रतिस्पर्धीहरुलाई पछि पार्दै उपसभापतिको जिम्मेवारी हात पारेकी हुन् ।

अधिवेशनले अन्य पदाधिकारी र सदस्यहरू निर्विरोध चयन गरेको रास्वपा स्याङ्जाले जनाएको छ । अधिवेशनबाट सचिवमा प्रसन्न पौडेल र सहसचिवमा जिल्ला संगठन विभाग प्रमुख टुकराज अर्याल चयन भएका छन् ।

त्यसैगरी सदस्यहरूमा पिताकुमारी खनाल, टंकप्रसाद न्यौपाने, देवीप्रसाद रेग्मी, डोलराज लम्साल र चण्डिकाप्रसाद सापकोटा चयन भएको प्रमुख निर्वाचन अधिकृत संघीय सांसद तथा पार्टीका केन्द्रीय संगठन विभाग सदस्य झविलाल डुम्रेले जानकारी दिए ।

रास्वपा स्याङ्जाले क्षेत्रीय नेतृत्व पनि टुंग्याएको छ । दुई निर्वाचन क्षेत्र रहेको जिल्लामा क्षेत्र नम्बर १ को सभापतिमा सूर्यप्रसाद पौडेल र क्षेत्र नम्बर २ को सभापतिमा जगदीश गैह्रे चयन भएका छन् ।

यसअघि पनि जिल्ला सभापतिको जिम्मेवारी सम्हालिसकेका भण्डारी पुनः निर्वाचित भएसँगै नवगठित कार्यसमितिले संगठन विस्तार, सदस्यता अभियान र आगामी राजनीतिक गतिविधिलाई थप प्रभावकारी बनाउने अपेक्षा गरिएको रास्वपा स्याङ्जाले जनाएको छ ।