स्याङ्जा जिल्ला प्रवेश गर्ने प्रमुख नाका राम्दी–गल्याङबाट जिल्लामा आउने आन्तरिक तथा बाह्य पर्यटकलाई लक्षित गर्दै स्वागत तथा सुरक्षित पर्यटन सचेतना अभियान सुरु गरिएको छ ।

अभियानको पहिलो दिन नै भारत लगायत विभिन्न देशबाट नेपाल भ्रमणमा आएका पर्यटकलाई स्वागत गर्दै स्याङ्जाका धार्मिक, सांस्कृतिक तथा पर्यटकीय गन्तव्यबारे जानकारीमूलक सामग्री वितरण गरिएको थियो । जिल्लाको पर्यटन सम्भावना चिनाउने र पर्यटकलाई स्याङ्जातर्फ आकर्षित गर्ने उद्देश्यले अभियान सञ्चालन गरिएको जनाइएको छ ।

अभियान अन्तर्गत पर्यटकलाई सुरक्षित यात्रा, पर्यटकमैत्री व्यवहार, वातावरण संरक्षण तथा जिम्मेवार पर्यटनसम्बन्धी सन्देशसमेत प्रवाह गरिएको छ । स्याङ्जालाई केवल मार्गको जिल्ला नभई घुम्न योग्य गन्तव्यका रूपमा स्थापित गर्ने प्रयासस्वरूप कार्यक्रम अघि बढाइएको एकीकृत सेवा कार्यालय स्याङ्जाले जनाएको छ ।

एकीकृत सेवा कार्यालय स्याङ्जाका प्रमुख जीवन पौडेलले पर्यटकलाई जिल्लाका आकर्षक गन्तव्यबारे जानकारी गराउँदै स्वागत गर्दा पर्यटन प्रवर्द्धनमा सकारात्मक प्रभाव पर्ने विश्वास व्यक्त गरे । उनले यसले स्याङ्जाको सकारात्मक पहिचान निर्माणसँगै सुरक्षित यात्राको सन्देशसमेत प्रवाह गर्ने बताए ।

सिद्धार्थ राजमार्गअन्तर्गत स्याङ्जा खण्ड साँघुरो र धेरै घुम्ती भएको क्षेत्र भएकाले यात्रु तथा पर्यटकको सुरक्षालाई विशेष प्राथमिकतामा राखिएको छ ।

सडक दुर्घटना न्यूनीकरण र सुरक्षित यात्राका लागि सचेतनामूलक अभियान उपयोगी हुने जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक नरेन्द्रबहादुर शाहीले बताए । उनका अनुसार यात्रु तथा पर्यटकलाई ट्राफिक नियमको पालना, सावधानीपूर्वक सवारी सञ्चालन र सुरक्षित यात्रासम्बन्धी जानकारीसहित पम्प्लेट वितरण गरिनेछ ।

अभियानले वातावरणमैत्री पर्यटनको अवधारणालाई पनि प्राथमिकतामा राखेको छ । पर्यटकलाई स्वच्छता कायम गर्न, फोहोर व्यवस्थापनमा ध्यान दिन तथा प्राकृतिक र सांस्कृतिक सम्पदाको संरक्षणमा सहयोग गर्न आग्रह गरिएको छ ।

“सुरक्षित यात्रा, जिम्मेवार पर्यटन र हार्दिक आतिथ्यतासहित स्याङ्जामा स्वागत छ” भन्ने सन्देशसहित सञ्चालन गरिएको अभियानलाई अस्थायी प्रहरी चौकीको सहकार्यमा निरन्तरता दिइने जनाइएको छ ।

कार्यक्रममा सहभागी केही भारतीय पर्यटकले यस्तो स्वागत र जानकारीमूलक अभियानले नेपाल भ्रमणलाई थप सहज र स्मरणीय बनाउने प्रतिक्रिया दिएका थिए ।

गण्डकी प्रदेश सरकार अन्तर्गतको एकीकृत सेवा कार्यालय स्याङ्जाको नेतृत्वमा जिल्ला प्रशासन कार्यालय, जिल्ला प्रहरी कार्यालय तथा जिल्ला ट्राफिक प्रहरी कार्यालय स्याङ्जाको सहकार्यमा अभियान सुरु गरिएको हो ।