स्याङ्जाको गल्याङ नगरपालिकाले हल गोरु संरक्षण र कृषकलाई परम्परागत खेतीप्रति आकर्षित गर्ने उद्देश्यले हल गोरु पाल्ने ११५ जना कृषकलाई जनही पाँच हजार रुपैयाँका दरले प्रोत्साहन अनुदान वितरण गरेको छ ।

चालू आर्थिक वर्ष २०८२/८३ अन्तर्गत सञ्चालन गरिएको ‘कृषक प्रोत्साहन अनुदान कार्यक्रम’ मार्फत नगरपालिकाले ११६ हल गोरुका लागि आवेदन परेकामा मापदण्ड पूरा गरेका ११५ जना कृषकलाई अनुदान उपलब्ध गराएको हो ।

नगरपालिकाका प्रमुख प्रशासकीय अधिकृत युवराज अधिकारीका अनुसार पछिल्ला वर्षमा पावर टिलरजस्ता यान्त्रिक उपकरणको प्रयोग बढेसँगै हल गोरु पाल्ने चलन घट्दै गएको छ । यही अवस्थालाई ध्यानमा राख्दै कृषकलाई हल गोरु पालनतर्फ प्रेरित गर्न प्रोत्साहन रकम उपलब्ध गराइएको उनले बताए ।

उनका अनुसार ग्रामीण क्षेत्रमा अझै पनि इन्धनको सहज उपलब्धता नहुने, पावर टिलर चलाउने दक्ष जनशक्तिको अभाव रहने र उपकरण बिग्रिएपछि मर्मतमा समस्या हुने भएकाले हल गोरुको आवश्यकता कायमै रहेको छ ।

नगरपालिकाको पशु सेवा शाखाका प्राविधिक महादेव बनले सूचना जारी गरेर आवेदन माग गरिएको र तोकिएको प्रक्रिया पूरा गरेका कृषकलाई मात्रै अनुदान उपलब्ध गराइएको जानकारी दिए ।

उनका अनुसार ११ वटै वडाका कृषकले हल गोरुको बिमा गरेको प्रमाण, गोठमा रहेका हल गोरुको तस्बिरसहित आवेदन दिएका थिए । त्यसपछि नगरपालिकाको टोलीले स्थलगत अनुगमन गरेर विवरण प्रमाणित गरेपछि सम्बन्धित कृषकको बैंक खातामा रकम जम्मा गरिएको हो ।

बनका अनुसार नगरपालिकाभित्र हल गोरु पाल्ने कृषकको संख्या आवेदन परेकाभन्दा बढी भए पनि कतिपयले सूचना नपाउँदा वा आवेदन नदिँदा अनुदानबाट वञ्चित भएका हुन सक्छन् ।

नगरपालिकाले आगामी आर्थिक वर्ष २०८३/८४ मा पनि यो कार्यक्रमलाई निरन्तरता दिने जनाएको छ । यस वर्ष अनुदान नपाएका हल गोरु पाल्ने कृषकलाई आगामी वर्ष प्राथमिकतामा राखिने नगरपालिकाले जनाएको छ ।