स्याङ्जाको फेदीखोला गाउँपालिका–२ मा मापदण्डविपरीत ट्रकको छतको हुडमा चौपाया ढुवानी गर्ने एक जनालाई प्रहरीले पक्राउ गरेको छ ।

स्याङ्जाको गल्याङबाट काठमाडौंतर्फ जाँदै गरेको बागमती प्रदेश ०१–००६ ख ३५३७ नम्बरको ट्रकमा २५ वटा भैंसी तथा पाडा र चार वटा बाख्रा गरी २९ वटा चौपायालाई ट्रकको छतको हुडमा राखेर अमानवीय ढंगले ढुवानी गरिरहेको अवस्थामा प्रहरीले फेला पारेको हो ।

प्रहरीले मापदण्डविपरीत चौपाया ढुवानी गरेको आरोपमा गल्याङ नगरपालिका–११ का ४० वर्षीय ईश्वर नेपालीलाई पक्राउ गरेको छ । उनीविरुद्ध पशुपक्षीसम्बन्धी कसुरमा अनुसन्धान अघि बढाइएको जिल्ला प्रहरी कार्यालय स्याङ्जाका सूचना अधिकारी तथा प्रहरी नायब उपरीक्षक रमेशदत्त अवस्थीले बताए ।

प्रहरीका अनुसार असार २२ गते राति करिब ११ बजे फेदीखोला गाउँपालिका–२ स्थित सिद्धार्थ राजमार्गमा नियमित सवारी जाँचका क्रममा उक्त ट्रक रोकेर निरीक्षण गरिएको थियो ।

जाँचका क्रममा ट्रकको हुडभित्र चौपायालाई अत्यन्त साँघुरो ठाउँमा कोचेर राखिएको र तोकिएको मापदण्डविपरीत ढुवानी भइरहेको पाइएपछि ट्रकसहित सबै चौपाया तत्काल नियन्त्रणमा लिइएको प्रहरीले जनाएको छ ।

प्रहरी नायब उपरीक्षक अवस्थीका अनुसार चौपायालाई अनावश्यक पीडा पुग्ने गरी ढुवानी गरिएको देखिएकाले कानुनअनुसार कारबाही प्रक्रिया अघि बढाइएको हो ।

हाल ट्रक, २९ वटा चौपाया र पक्राउ परेका ईश्वर नेपाली प्रहरीको नियन्त्रणमा छन् । घटनामा पशुपक्षीसम्बन्धी कसुरअन्तर्गत अनुसन्धानका लागि जिल्ला प्रशासन कार्यालय स्याङ्जाबाट पाँच दिनको म्याद थप अनुमति प्राप्त भइसकेको र थप अनुसन्धान जारी रहेको प्रहरीले जनाएको छ ।