स्याङ्जाको भीरकोटबाट १६ वर्षीया बालिकालाई भारत लगेर लुकाएको आरोपमा पक्राउ परेका एक जना पुर्पक्षका लागि कारागार चलान भएका छन् । घटनामा संलग्न रहेको आरोप लागेका अन्य आठ जनाको भने प्रहरीले खोजी गरिरहेको छ ।

प्रहरीका अनुसार २०८२ असार ९ गते भीरकोट नगरपालिका–१ बयरघारीबाट बालिकालाई ललाईफकाई आर्थिक प्रलोभनमा पारी योजना बनाएर बेचबिखन गर्ने उद्देश्यले भारत पुर्‍याइएको थियो ।

रुपन्देहीको देवदह नगरपालिका–टटेरा घर भई बयरघारीमा काम गरी बस्ने ३५ वर्षीय घनश्याम चौधरीसहित आठ जनाले बालिकालाई भारतको महाराजगन्ज जिल्लास्थित बरगदवा गाउँमा लगेर लुकाइछिपाई राखेको आरोप छ ।

घटनाबारे मानव बेचबिखन तथा ओसारपसारसम्बन्धी मुद्दा दर्ता गरी प्रहरीले अनुसन्धान अघि बढाएको थियो ।

मुद्दाका प्रतिवादीमध्ये घनश्याम चौधरीलाई प्रहरीले २०८३ साउन १० गते पक्राउ गरेको थियो ।

अनुसन्धान पूरा गरी उनलाई स्याङ्जा जिल्ला अदालतमा पेश गरिएकोमा अदालतले भदौ ८ गते पुर्पक्षका लागि कारागार चलान गर्ने आदेश दिएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीले जानकारी दिए ।

घटनामा संलग्न रहेको आरोप लागेका अन्य आठ जना प्रतिवादीविरुद्ध पक्राउ पुर्जी जारी भएको छ । उनीहरूको खोजतलास भइरहेको प्रहरीले जनाएको छ ।