पोखरा । आज राष्ट्रिय धान दिवस । नेपालभर असार १५ गते,धान दिवस, रोपाइँ जात्रा आदि नामले मनाइँदै छ । किसान वर्षभरका लागि छाक जुटाउन यो महिनामा खेतीमा ब्यस्त हुन्छन् ।

आजका दिन असारे भाकामा लोकदोहोरी गाउँदै धान रोपिन्छ । युवा लाठे र युवती रोपाहारले खेतका गराको हिलो छ्यापाछ्याप गरेर मनोरञ्जन गर्छन् । कामको चटारोले थकित भएका किसान शक्तिप्राप्तिका लागि दही चिउरा खान्छन् । यसबेला दही चिउराले शरीरमा शीतलता भई शक्ति सञ्चय हुने विश्वास गरिन्छ ।

असार १५ लाई नेपाली समाजमा दही चिउरा खाने पर्वका रुपमा पनि लिइन्छ । खेतीपातीबाहेक अन्य पेसा र व्यवसायमा लागेका नेपालीले पनि आज दही चिउरा खाई असार १५ मनाउँछन् । आज गाउँठाउँका हुने खानेले बेठी लगाएर धान रोपाइँ गर्छन् । यसरी धान रोपाइँ गरे खेतबाट सह बसी मनग्य उत्पादन हुने विश्वास रहेको छ ।

यस्तै आज पोखरामा १६ औँ असारे रोपाई महोत्सव –२०७६ हुँदैछ । ‘पोखरा सबै मौसमका लागि’ भन्ने मुल नाराका साथ पोखरा पर्यटन परिषदले पोखरा १७ महतगौँडाको बिरुवाफाँटमा रोपाईँ महोत्सव आयोजना गरेको हो । पोखराको पामे र बेगनास क्षेत्र वरीपरी पनि धान दिवस मानईन्छ ।

महोत्सवको अवसरमा साउने प्रतियोगिता (हलगोरुको दौड), विभिन्न आमा समुह बीच असारे गीत तथा रोपाइँ प्रतियोगिता,साँस्कृतिक प्रस्तुती लगाएतका कार्यक्रम समावेश गरिएको छ । परिषदले विगत १५ वर्षदेखि असारे रोपाई महोत्सव गर्दै आएको छ ।