ललितपुर । एक १९ वर्षीया युवतीलाई बलात्कार गरेको आरोपमा प्रहरीले प्रहरीले कांग्रेस  र युवा संघका एक/एक जना नेतालाई पक्राउ गरेको छ । पक्राउ पर्नेमा नुवाकोटका ज्ञानेन्द्र गजुरेल र  दाङका सन्देश शर्मा पोखरेल  छन् । महानगरीय प्रहरी परिसर, जावलाखेलले दुवै जनालाई ३ कार्तिकमा पक्राउ गरेपनि बल्ल घटना सार्वजनिक भएको हो ।

ललितपुर प्रहरीका डीएसपी सन्तोष तामाङका अनुसार पोखरेलले आफू पूर्वएमालेको युवा संघको उद्योग तथा समृद्धि विभागको सदस्य भएको बताएका छन् भने गजुरेलले नेविसंघको पूर्वकेन्द्रीय सदस्य र हाल कांग्रेस नुवाकोट जिल्ला सदस्य भएको बयान दिएका छन् ।

गजुरेल नेपाली काँग्रेस नुवाकोटका आमन्त्रित जिल्ला सदस्य रहेको बताइएको छ । उनलाई नेपाली काँग्रेस नुवाकोटका सभापति जनदीश्वरनरसिंह केसीले गत मंसिरमा आमन्त्रित सदस्यमा मनोनित गरेका थिए ।त्यतिबेला केसीले गजुरेलसहित ८७ जनालाई आमन्त्रित सदस्यमा मनोनयन गरेका थिए ।

महानगरीय प्रहरी परिसर ललितपुरका प्रमुख एसएसपी टेकप्रसाद राइका अनुसार गजुरेल नयाँ बसपार्कबाट पक्राउ परेका हुन् । गजुरेलमाथि थप अनुसन्धान भइरहेको पनि राईले जानकारी दिए । उनीहरुले अर्थशास्त्रमा स्नातकोत्तर गरेका छन् । दुवै जनाले मिलेर २९ असोजमा ललितपुरमा १९ वर्षीय किशोरीमाथि बलात्कार गरेको अभियोग छ ।

अनुसन्धानमा संलग्न अधिकृतका अनुसार घटना भएको दिन गजुरेलले किशोरीलाई विहान ११ बजेतिर कुमारीपाटीस्थित पोखरेलको कोठामा ल्याएका थिए । दिनभर दुई जना मात्रै बसेर मादक पदार्थ सेवन गरेका थिए । जब राति पोखरेल पनि कोठामा आइपुगे । त्यसपछि तीनै जनाले पुनः मापसे गरेका पीडित र पीडक दुवैले स्वीकारेका छन् ।

अर्धचेत भएको अवस्थामा ज्ञानेन्द्र सुतिसकेपछि सन्देशले अर्को कोठामा लगेर जबरजस्ती गरेको पीडित किशोरीले दिएको जाहेरीमा उल्लेख छ । तर, सन्देशले पनि इन्कारी बयान दिएका छन् । उनले मापसे गरेको स्वीकारे पनि जबरजस्ती करणी नगरेको दाबी गरेका छन् ।

ज्ञानेन्द्र र पीडित बीच सामाजिक सञ्जालमार्फत चिनजान भएको देखिन्छ भने उनीहरु प्रेम सम्बन्धमा भएको हुनसक्ने म्यासेजबाट देखिने अनुसन्धान अधिकृतहरु बताउँछन् ।

यसअघि मंगलबार मात्रै बलात्कार आरोपमा रत्नराज्य लक्ष्मी क्याम्पसका विद्यार्थी नेता इन्द्रहाङ राई पनि पक्राउ परेका छन् । उनी आरआर कलेजको स्ववियू सह-सचिव एवं अनेरास्वियूका केन्द्रीय सदस्य थिए ।