काठमाडौं । बङ्गालको खाडीमा विकसित भइरहेको नयाँ न्यूनचापीय प्रणालीको प्रभावले आगामी मङ्गलबारदेखि नेपालका अधिकांश भूभागमा वर्षा हुने सम्भावना देखिएको छ। मौसमविद्हरूले करिब एक हप्ताभन्दा बढी समयसम्म वर्षा हुन सक्ने अनुमान गर्दै आवश्यक सतर्कता र पूर्वतयारी अपनाउन आग्रह गरेका छन्।

मौसमविद् विनोद पोखरेलका अनुसार अन्तर्राष्ट्रिय तथा क्षेत्रीय मौसम पूर्वानुमान मोडेलहरूले आगामी सातादेखि देशका धेरैजसो स्थानमा लगातार झरी पर्ने र केही क्षेत्रमा भारी वर्षासमेत हुन सक्ने सङ्केत देखाएका छन्। यद्यपि वर्षाको मात्रा, अवधि र प्रभाव पर्ने स्थानबारे थप स्पष्ट हुन बाँकी रहेकाले पूर्वानुमानमा परिवर्तन हुन सक्ने उनले बताएका छन्।

वर्षाको सम्भावनालाई ध्यानमा राख्दै नागरिकलाई जल तथा मौसम विज्ञान विभागबाट जारी हुने आधिकारिक पूर्वानुमान तथा सूचनाहरू नियमित रूपमा पछ्याउन आग्रह गरिएको छ।

धानबाली भित्र्याउने किसानलाई चिन्ता

कात्तिक महिना धान काट्ने र भित्र्याउने मुख्य समय भएकाले सम्भावित वर्षाले किसानको कृषि उपजमा असर पार्न सक्ने देखिएको छ। विशेषगरी पाकेको धान खेतमै रहेको अवस्थामा लामो समयसम्म वर्षा भएमा बालीमा क्षति पुग्नुका साथै कटानी र सुकाउने कामसमेत प्रभावित हुन सक्छ।

मौसमविद् पोखरेलले मङ्गलबारदेखि धान काट्ने योजना बनाएका किसानलाई मौसमको पछिल्लो अवस्थाको जानकारी लिएर मात्र काम अघि बढाउन सुझाव दिएका छन्।

सम्भव भएसम्म वर्षा सुरु हुनुअघि पाकेको धान काटेर सुरक्षित स्थानमा भित्र्याउन वा मौसम अनुकूल भएपछि मात्र कटानी गर्ने गरी योजना बनाउन उपयुक्त हुने देखिन्छ। वर्षासँगै केही स्थानमा चट्याङ र असिनाको सम्भावना पनि रहेकाले कृषि बाली जोगाउन विशेष सावधानी अपनाउनुपर्नेछ।

पहाडी क्षेत्रमा पहिरो, हिमाली भेगमा हिमपातको जोखिम

मनसुनपछिको समय पदयात्रा तथा पर्यटकीय भ्रमणका लागि उपयुक्त मानिए पनि सम्भावित वर्षाले उच्च पहाडी र हिमाली क्षेत्रमा यात्रा जोखिमपूर्ण बनाउन सक्छ। पहाडी क्षेत्रमा पहिरो तथा सडक अवरुद्ध हुने र उच्च हिमाली भेगमा हिमपात हुन सक्ने भएकाले यात्रु तथा पर्यटकले विशेष सावधानी अपनाउनुपर्ने देखिएको छ।

यात्रामा निस्कन लागेका तथा हाल पदयात्रामा रहेका पर्यटकलाई मौसमको अवस्था बुझेर मात्र यात्रा तय गर्न आग्रह गरिएको छ। सम्भावित प्रतिकूल मौसमका कारण पदमार्ग, सडक तथा हवाई उडान प्रभावित हुन सक्ने भएकाले वैकल्पिक योजना तयार राख्नु उपयुक्त हुनेछ।

पूर्वतयारीमा जोड

सम्भावित वर्षाका कारण नदी तथा खोलामा पानीको बहाव बढ्न सक्ने, कमजोर भौगोलिक क्षेत्रका बस्तीमा पहिरोको जोखिम बढ्न सक्ने र दैनिक जनजीवन प्रभावित हुन सक्ने भएकाले सम्बन्धित निकाय तथा सर्वसाधारणलाई पूर्वतयारीमा जुट्न आवश्यक देखिएको छ।

वर्षाको प्रभाव पर्ने स्थान र तीव्रताबारे थप विवरण प्राप्त हुँदै जाँदा पूर्वानुमान अद्यावधिक हुन सक्ने भएकाले जल तथा मौसम विज्ञान विभागका आधिकारिक बुलेटिन र विपद् व्यवस्थापनसम्बन्धी सूचनालाई आधार मानेर आवश्यक निर्णय लिनु महत्त्वपूर्ण हुनेछ।